သတိပထၢၼ်ႇလၢႆးငၢႆႈ
ၵႂၢမ်းၼၢမ်း
မႄးထတ်းပပ်ႉၼႆႉ ၽိုၼ်ငဝ်ႈတိုၼ်းမၼ်း ပဵၼ်ၽၢႆႇဢင်းၵိတ်ႉ ဢၼ်ၸိုဝ်ႈဝႃႈ Mindfulness meditation made easy ဢၼ်ၸဝ်ႈၶူးလူင် ထမ်ႇမသႃႇမိ တႅမ်ႈသေ လုၵ်ႈၼွင်ႉမၼ်းၸဝ်ႈ ပေႃႉၽိမ်းဢွၵ်ႇ ၼႂ်းမိူင်းမလေးသျႃး ဢွၼ်တၢင်းပိူၼ်ႈယဝ်ႉ။ ဝၢႆးၼၼ်ႉ သမ်ႉသိုပ်ႇပေႃႉဢွၵ်ႇထႅင်ႈ တီႈၼႂ်း မိူင်းသီႇႁူဝ်ႇ၊ မိူင်းၵူဝ်းရီးယႃး၊ မိူင်းထႆး လႄႈ မိူင်းႁူမ်ႈတုမ်မိူင်းမၢၼ်ႈယဝ်ႉ။ ၵူဝ်းရီးယႃး လႄႈ ထႆးတႄႉ ယင်းပိၼ်ႇပဵၼ်ၽႃႇသႃႇၽႂ်မၼ်းသေ ဢိတ်ႇဢွၵ်ႇထႅင်ႈၵွၼ်ႇယဝ်ႉ။
မိူဝ်ႈလိူၼ်ႈၼူဝ်ႇဝိမ်ႇပႃႇ ဝၼ်းထိ 22. 2014၊ လိူၼ်ၸဵင်မႂ်ႇ (1) ၶမ်ႈၼၼ်ႉ တူၵ်းမႅၼ်ႈ ဝၼ်းၵိူတ်ႇပီၵွၼ်းၶမ်း ၸဝ်ႈၶူးလူင် တွၵ်ႇတႃႇ ၶမ်းမၢႆ ထမ်ႇမသႃႇမိ ဝတ်ႉဢွၵ်ႉၸၽိူတ်ႉ မိူင်းဢိင်ႇၵလၢၼ်ႇယဝ်ႉ။ ဢိင်ၼိူဝ် လွင်ႈလီ မင်ႇၵလႃႇၼႆႉသေ သင်ႇၶလႄႈ ၵူၼ်းမိူင်းလၢႆးၶႃႈတင်းသဵင်ႈ ႁူမ်ႈလူၺ်ႈ ပီႈၼွင်ႉၵူၼ်းမိူင်းတႆးၶဝ် ဢွၼ်ၵၼ် ၸတ်းႁဵတ်းဝၼ်းၵိူတ်ႇမၼ်းၸဝ်ႈ ၵႃႈတီႈဝတ်ႉႁူဝ်လွႆ ဝၢၼ်ႈၼွင်ပၢင်ႇ ဢၼ်ပဵၼ် ဝၢၼ်ႈၸႃႇတိ ၸဝ်ႈၶူးလူင်ႁဝ်းၼၼ်ႉယဝ်ႉ။
လွင်ႈၶွင်တွၼ်ႈဝၼ်းၵိူတ်ႇမၼ်းၸဝ်ႈၼၼ်ႉ လႅပ်ႈတေမီး ၵူၼ်းတင်းၼမ် ဢွၼ်ၵၼ် ထၢမ်တီႈၸဝ်ႈၶူးလူင်ႁဝ်းယူႇ။ ၶေႃႈတွပ်ႇမၼ်းတႄႉ ႁဝ်းလႆႈႁၼ်တီႈၼႂ်းပပ်ႉ ၶၢဝ်းတၢင်းသီႇႁူဝ်ႇ မၢႆ (15) ဢၼ်သႂ်ႇၸိုဝ်ႈမူႇလိၵ်ႈဝႃႈ "ၸဝ်ႈၶူးႁဝ်းလူဝ်ႇသင်ၶႃႈႈ တွၼ်ႈတႃႇပီၵွၼ်းၶမ်း" ၼၼ်ႉယဝ်ႉ။ ၼႂ်းၼၼ်ႉ ၸဝ်ႈၶူးလူင်လၢတ်ႈဝႃႈ ဢၼ်မၼ်းၸဝ်ႈၶႂ်ႈလႆႈၼၼ်ႉ (1) ႁႂ်ႈဢွၼ်ၵၼ်ဢဝ် ၵူႉသူဝ်ႇၽုၵ်ႇတူၼ်ႈမႆႉၼမ်ꧦ၊ (2) ပပ်ႉလိၵ်ႈတႆး၊ (3) ယေးငိုၼ်းၸွႆႈထႅမ်လုၵ်ႈဢွၼ်ႇတႆး ၸိူဝ်းၼႆႉယဝ်ႉ။
မိူဝ်ႈၽူႈပိၼ်ႇႁွတ်ႈၽႅဝ်တီႈတႃႈၵုင်ႈ တွၼ်ႈတႃႇၸွႆႈထႅမ် ပၢင်ၵုမ်လိၵ်ႈလင်ႇၵႃႇလူင်တႆး ပွၵ်ႈၵမ်း (1) ဢၼ်ၸတ်းႁဵတ်းတီႈ ဝတ်ႉၵဝ်ႈလၵ်းၼၼ်ႉ ၸဝ်ႈၶူးတေႇဝိၼ်ႇတႃႇၽိပႃႇလ (ၼမ်ႉၶမ်း) ၵေႃႈလၢတ်ႈဝႃႈ "တွၼ်ႈတႃႇဝၼ်းၵိူတ်ႇၼႆႉ ၸဝ်ႈၶူး ၶႂ်ႈလႆႈပပ်ႉလိၵ်ႈပဵၼ် ၶွင်တွၼ်ႈ ဝၼ်းၵိူတ်ႇမၼ်းၸဝ်ႈဝႃႇ" ၼႆႁင်းၸဝ်ႈ ၼႂ်းယၢမ်း ဢုပ်ႇၵၼ် မိူင်ႈတိုၵ်ႉပႂ်ႉတၢင်ႇဢဝ်ၶိုၼ်း သိမ်းၵတ်ႉၽူင်းၼၼ်ႉယဝ်ႉ။ ဝၢႆးပၢင်ၵုမ်လိၵ်ႈလူင်ယဝ်ႉသေ မႃးမီးတီႈ လၢႆးၶႃႈၶိုၼ်းၼၼ်ႉသမ်ႉ လႆႈၵုမ်ၵၼ်တင်း ၸဝ်ႈၶူးသုမၼ (လၢႆးၶႃႈ) (ႁူဝ်ပဝ်ႈသင်ႇၶလုၵ်ႈႁဵၼ်းတႆး မိူင်းသီႇႁူဝ်ႇ)ထႅင်ႈယဝ်ႉ။ မိူဝ်ႈၼၼ်ႉ ၸင်ႇတႅပ်းတတ်း တႃႇတေပိၼ်ႇပပ်ႉဢၼ်ၼႆႉမႃးယဝ်ႉ။ တႅပ်းတတ်းယဝ်ႉသေတႃၵေႃႈ ပႆႇလႆႈတႄႇပိၼ်ႇၵမ်းလဵဝ်၊ ဝၢႆးၶဝ်ႈဝႃႇယႉဝ်ႉ မွၵ်ႈသိပ်းဝၼ်းပၢႆꧦၼႆႉၵွၼ်ႇ တႆးၵေႃႉသမ်ႉထၢမ်မႃးသေ ႁူႉဝႃႈ ပႆႇလႆႈတႄႇပိၼ်ႇလႄႈ မၼ်းၸင်ႇပၼ်တၢင်းႁၼ်ထိုင်ဝႃႈ "မီးၶၢဝ်းယၢမ်းၵႃႈႁိုဝ်ၵေႃႈ ပိၼ်ႇၵႂႃႇၸွမ်းၼင်ႇၶၢဝ်းယၢမ်းမၼ်းလႆႈလႄႈ ပေႃးဢွမ်ႇၼၼ် ႁၢၼ်ႉတေႃႇထိုင် ပွႆးဝၼ်းၵိူတ်ႇၸဝ်ႈၶူးၵေႃႈ တေဢမ်ႇယဝ်ႉလႆႈ" ၼႆႁင်း ၽူႈပိၼ်ႇယဝ်ႉ။ ႁဵတ်းၼၼ်သေ ၸင်ႇပဵၼ်တႄႇပိၼ်ႇ ပပ်ႉၼႆႉမႃႈယဝ်ႉ။ ယိၼ်းၸူမ်းၶွပ်ႈၸႂ်ၼိူဝ်ႈ ၵူႈၸဝ်ႈၵူႈၵေႃႉတႄႉတႄႉယူႇၶႃႈ။
လိုၼ်းသုတ်း ဢၼ်ၶႂ်ႈယွၼ်းၶွပ်ႈၸႂ်ထႅင်ႈတႄႉ ပဵၼ်ၸဝ်ႈတႃႇၼပပ်ႉ ဢၼ်ႁဵတ်းႁႂ်ႈ တၢင်းယိူင်းဢၢၼ်းလူင် ပိၼ်ႇပပ်ႉၼႆႉ တဵ႞်ထူၼ်ႈၼၼ်ႉယဝ်ႉ။ ဢိင်ၼိူဝ်ၸေႇတၼႃႇ ပေႃႈဢွၵ်ႇမႄႈဢွၵ်ႇႁဝ်းၶဝ်တင်ႈသဵင်ႈသေ ၸင်ႇၸၢင်ႈလူႇတၢၼ်းပပ်ႉၼႆႉ ႁႂ်ႈပဵၼ် တီႈမၢႆတွင်းၵိုမ်း ဝၼ်းၵိူတ်ႇ ပီၵွၼ်းၶမ်း ၸဝ်ႈၶူးလူင် ၶမ်းမၢႆ ထမ်ႇမသႃႇမိယဝ်ႉ။ ယိၼ်းၸူမ်းၸွမ်း လွင်ႈဢၼ် ပေႃႈဢွၵ်ႇမႄႈဢွၵ်ႇၶဝ်တင်းသဵင်ႈ ဢွၼ်ၵၼ်သၢင်ႈ ပႃႇရမီႇၸွမ်းမၼ်းၸဝ်ႈတႄႉတႄႉ။ ဢၼ်ႁဵတ်းႁႂ်ႈ တၢင်းယိူင်းဢၢၼ်း ၽူႈပိၼ်ႇတဵမ်ထူၼ်ႈသေ လႆႈသၢင်ႈပႃႇရမီႇၸွမ်း ၸဝ်ႈၶူးလူင်လႄႈ ပေႃႈဢွၵ်ႇမႄႈဢွၵ်ႇၶဝ်တင်းသဵင်ႈၵေႃႈ ယိၼ်းၸူမ်းၶွပ်ႈၸႂ်ယႂ်ႇၼမ်တႄႉꧦ။
ႁႂ်ႈၸဝ်ႈၶူးႁဝ်း ယူႇလီၵတ်းယဵၼ် တင်းတူဝ်တင်းၸႂ်သေ သိုပ်ႇႁဵတ်းၵၢၼ်သႃႇသၼႃႇၵႂႃႇလႆႈ ၶၢဝ်းႁိုင်သေၵမ်းၶႃႈ။
ႁႂ်ႈၵၢၼ်လီၵူႉသူဝ်ႇ ပႃႇရမီႇႁဝ်းၶႃႈ သုၵ်ႈသီပၼ် ၸႂ်ၵဝ်ႇသဝ်ႈဝဝ်းလမ်ႁဝ်းၶႃႈတင်းသဵင်ႈသေ ၸဵဝ်းႁွတ်ႈထိုင် တီႈၵတ်းယဵၼ်သေၵမ်းလူၺ်ႈ။
ၸဝ်ႈၶေႇမိၼ်ႇတသႃႇရ
02.11.2014
လမ်းၼႂ်း
မႄးထတ်း
