ၸၢတ်ႈၸဝ်ႈမႁႃႇၸၼၵ/ႁူပ်ႉထူပ်း ၼၢင်းယိင်းဢွၼ်ႇ
မႄႈၸဝ်ႈၵႅမ်မိူင်း ၼၢင်းသီႇဝလိၼႆႉ ၸွမ်းလင်ၼေႃႇၶမ်းၸဝ်ႈ ဢမ်ႇၸမ်ဢမ်ႇၵႆ မိူၼ်ၼင်ႇၵူႈပွၵ်ႈၼၼ်ႉယူႇယဝ်ႉ။ ၵမ်းၼၼ်ႉ သွင်ၶႃသွင်ၵေႃႉ ဢုပ်ႇၵၼ်ၵႂႃႇၸွမ်းတၢင်းသေ ဢမ်ႇႁိုင်ဢမ်ႇၼၢၼ်း ႁွတ်ႈၽႅဝ်တီႈ ၽၵ်းတူဝဵင်းထူႇၼ ၽၢႆႇၸၢၼ်းၼၼ်ႉယူႇယဝ်ႉ။ တီႈတၢင်းၶဝ်ႈ တီႈၽၵ်းတူဝဵင်းၼၼ်ႉ မီးၼၢင်းယိင်းဢွၼ်ႇၶဝ် ဢဝ်လူင်ႈဢွၼ်ႇသေ ၽတ်းၽွင်လိၼ်လဵၼ်ႈဝႆႉယူႇ။ ၼႂ်းၶဝ်ၼၼ်ႉ ယိင်းၵေႃႉၼိုင်ႈ မိုဝ်းမၼ်းၶွၼ်ၼိုင်ႈ တိုဝ်းဝႅၼ်ၶမ်းသွင်သဵၼ်ႈသေ ၶွၼ်ၼိုင်ႈသမ်ႉ တိုဝ်းဝႆႉသဵၼ်ႈၼိုင်ႈယဝ်ႈ။
မိူဝ်ႈမၼ်းၼၢင်း ဢဝ်လူင်ႈဢွၼ်ႇ သႂ်ႇမုၼ်ႈၽွင်လိၼ်သေ ၽတ်းယူႇ၊ ၶိုင်ယူႇၼၼ်ႉ ၵွပ်ႈဝႅၼ်ၶမ်းၽတ်ႉသႂ်ႇၵၼ် မိူဝ်ႈမိုဝ်းမၼ်းၼၢင်း တူင်ႉၼိုင်ၼၼ်ႉလႄႈ ဢွၵ်ႇသဵင်ဢူၼ်မေႃးဝႆႉယဝ်ႈ။ ၽၢႆႇၼိုင်ႈၸမ်း ၵွပ်ႈမီးဢၼ်လဵဝ်သေ ဢမ်ႇမီးတီႈ ၽတ်ႉသႂ်ႇၵၼ်လႄႈ ဢမ်ႇမီးသဵင်ဢွူၼ်မေႃးသင်။
ပေႃးၼေႃႇၶမ်းၸဝ်ႈ လႆႈႁၼ်ၸိူင်ႉၼၼ်ၸိုင် မၼ်းၸင်ႇဝူၼ်ႉၼႂ်းၸႂ်မၼ်းဝႃႈ "မိူဝ်ႈလဵဝ် ၼၢင်းၸုမ်ႈလူင် ၸွမ်းလွင်ၵဝ်မႃးလူင်ယူႇ။ ၽူႈယိင်းဢၼ်ဝႃႈၼၼ်ႉ ပဵၼ်တၢင်းမွင်သဝ်ႈ ပုၼ်ႈတႃႇရႁၢၼ်းၶဝ်ယဝ်ႉ။ ပေႃးပိူၼ်ႈႁၼ်ၼႆ ပိူၼ်ႈတေဝႃႈ ပဵၼ်ရႁၢၼ်းယူႇၵေႃႈ ယင်းပႆႇဝၢင်းပႅတ်ႈလႆႈ မေးမၼ်းၵွၼ်ၼႆ တေသႄႉၼႄးၵဝ်ယဝ်ႉ။
သင်ဝႃႈယိင်းဢွၼ်ႇၼႆႉ ပဵၼ်ၽူႈမီးပၺႃႇၸိုင် ၵဝ်ထၢင်ႇမၼ်းတေလၢတ်ႈၵႂၢမ်းလႆႈ ၼင်ႇႁိုဝ် ၼၢင်းၸုမ်ႈသီႇဝလိ ပေႃးတေဢမ်ႇႁတ်းၸွမ်းၵဝ်ႇၼၼ်ႉယူႇ။ ၵဝ်တေၵႂႃႇတွင်ႈထၢမ်မၼ်းသေ ႁဵတ်းႁႂ်ႈမၼ်းၼၢင်း တွပ်ႇသေလႄႈ ႁၢမ်ႈၼၢင်းသီႇဝလိ ပေႃးတေဢမ်ႇၸွမ်းၵဝ်ၼၼ်ႉၵွၼ်ႇ" ၼႆသေ ၵႂႃႇၸူး ၼၢင်းယိင်းဢွၼ်ႇၵေႃႉၼၼ်ႉယဝ်ႉ။ ၸင်ႇထၢမ်ဝႃႈ " ယိင်းဢွၼ်ႇဢိူၺ်း ၵွပ်ႈသင်လႄႈ မိုဝ်းမႂ်းၽၢႆႇၼိုင်ႈၼၼ်ႉ မေႃးၵလိင်းလိင်းၼႆသေ ၽၢႆႇၼိုင်ႈသမ်ႉဢမ်ႇမေႃးသင်၊ ယဵၼ်သီႇသီႇဝႆႉလႃႇ" ၼႆယဝ်ႉ။ ပေႃးယိင်းဢွၼ်ႇၼၼ်ႉ လႆႈငိၼ်းၵႂၢမ်း ၼေႃႇၶမ်းၸဝ်ႈယဝ်ႉၼႆ ၸွမ်းၼင်ႇယိင်းဢွၼ်ႇၼၼ်ႉ မီးပႃႇရမီႇ ၵေႃႉၼိုင်ႈလႄႈ မၼ်းတွပ်ႇၵႂႃႇလူၺ်ႈ ၵႂၢမ်းလီမၢႆ လီတွင်းၼၼ်ႉယဝ်ႈ။
ယိင်းဢွၼ်ႇၼၼ်ႉ တွပ်ႇဝႃႈ "ၸဝ်ႈရႁၢၼ်းဢိူၺ်း ဝႅၼ်ဢၼ်တိုဝ်းဝႆႉ ၼႂ်းမိုဝ်းၶႃႈၼၢင်းၼႆႉ ယွၼ်ႉပိူဝ်ႈမၼ်း မီးသွင်ဢၼ်လႄႈ ၸင်ႇၽတ်ႉသႂ်ႇၵၼ်သေ ဢွၵ်ႇသဵင်မႃးဢေႃႈ။ ဢၼ်ၼႆႉ ပဵၼ်သၽေႃး ဢၼ်ယူႇၸွမ်းၵၼ် သွင်ဢၼ်ၼၼ်ႉၶႃႈယဝ်ႉ။ ၶွၼ်ၽၢႆႇၼႆႉၸမ်း ယွၼ်ႉပိူဝ်ႈမၼ်းမီး ဢၼ်လဵဝ်ၵူၺ်းလႄႈ မၼ်းဢမ်ႇၸၢင်ႈတုမ်ႉတွႆႇသႂ်ႇၵၼ်လႄႈ ဢမ်ႇဢွၵ်ႇသဵင်မေႃးသင်ၼၼ်ႉၶႃႈယဝ်ႉ။ ဢၼ်ၼႆႉ မိူၼ်ၵၼ်တင်း ၸဝ်ႈရႁၢၼ်းၶဝ် ယူႇတူၼ်လဵဝ်ပႃးလဵဝ် ဢၼ်ပေႃးပွႆႇပႅတ်ႈၵိလေႇသႃႆၼၼ်ႉယဝ်ႉ၊ ၸဝ်ႈရႁၢၼ်းဢိူၺ်း ဝႅၼ်မိုဝ်းၼႆႉ ၵူၺ်းဢမ်ႇၸႂ်ႈ ဢၼ်မီးဝႆႉၼႂ်းလေႃးၵတင်းလူင်ၼႆၵေႃႈ မိူၼ်ၼႆၼင်ႇၵဝ်ႇၶႃႈယဝ်ႉ။ ပေႃးမီးတႆးၵေႃႉၼႆ လွင်ႈဢၼ်လႆႈမေႃးမႄးထဵင်ၵၼ်ၼၼ်ႉ ပဵၼ်ထုင်းၸၢမ်ႇမၼ်းၶႃႈယဝ်ႉ။
ပေႃးယူႇၵေႃႉလဵဝ်ၼႆၸိုင် ၽႂ်တေဢမ်ႇမႃးထဵင်။ ၸဝ်ႈႁဝ်းၼႆႉၵေႃႈ ၵွပ်ႈၶႂ်ႈလႆႈမိူင်းၽီလႄႈ ပၢတ်ႇၼူတ်ႇထႃၽူမ်သေ မႃးႁဵတ်းရႁၢၼ်းၼႆႉ ၶႅၼ်းတေႃႈ ထုၵ်ႇမႅၼ်ႈၸႂ် လွင်ႈလႆႈ ယူႇႁင်းၵူၺ်းၼၼ်ႉၶႃႈလႄႈ။ တေႃႈလဵတ်ႁဵတ်းသင်လႄႈ ၸဝ်ႈႁဝ်းပႃးတင်း ယိင်းႁၢင်ႈလီၼႆႉသေ ၸွၼ်ႇႁွၼ်ႈလူင်ယူႇၶႃႈလႃႇ။ ၼၢင်းယိင်းၵေႃႉၼႆႉ ပဵၼ်မေးၸဝ်ႈၶႃႈႁႃႉ။ ဢမ်ႇၼၼ် ပဵၼ်ၼွင်ႉယိင်းၸဝ်ႈႁႃႉ။ ရႁၢၼ်းဢၼ်ဝႃႈၼၼ်ႉ တီႈတႄႉမၼ်း တေႃႈၼွင်ႉယိင်းၸဝ်ႈၵဝ်ႇၵေႃႈ ယင်းဢမ်ႇထုၵ်ႇလီ ၵႂႃႇၸွမ်းၵၼ်ၸိူင်ႉၼႆၶႃႈ။ ရႁၢၼ်းဢၼ်ဝႃႈၼၼ်ႉ ပေႃးယူႇၸွမ်းၽူႈယိင်းႁိုင်မႃး ၸၢင်ႈပဵၼ်ၽေး တွၼ်ႈတႃႇရႁၢၼ်းၶႃႈဢေႃႈ" ၼႆယဝ်ႉ။
ၵမ်းၼၼ်ႉ ၼေႃႇၶမ်းၸဝ်ႈ ၸင်ႇလၢတ်ႈတေႃႇ ၼၢင်းၸုမ်ႈလူင်ဝႃႈ "ၼၢင်းၸုမ်ႈလူင်ဢိူၺ်း ၵႂၢမ်းဢၼ်ယိင်းဢွၼ်ႇလၢတ်ႈၵႂႃႇတေႃႈလဵဝ်ၼႆႉ လႆႈငိၼ်းယူႇ ဢမ်ႇၸႂ်ႈၼႄႇ။ ယိင်းဢွၼ်ႇၼႆႉ ပေႃးတူၺ်းပၢၼ်သႅၼ်းမၼ်းတႄႉ မီးတၢၼ်ႇလုၵ်ႈယိင်း လၢၼ်ယိင်းၵဝ်ၵူၺ်း။ ပေႃးတူၺ်းၸိူဝ်ႉၶိူဝ်းလႄႈ ႁၢင်ႈၽၢၢင်မၼ်းၼႆၵေႃႈ တၢၼ်ႇၶႃႈၸႂ်ႉၵဝ်ၵူၺ်း။ တေႃႈလဵဝ် ဢၼ်ၵဝ် လႆႈၶၢမ်ႇတၢင်းလုၵ်ႈဢွၼ်ႇ သႄႉၼႄးၵဝ်ၼႆႉ ယွၼ်ႉပိူဝ်ႈမႂ်းယဝ်ႉ။ ပေႃးမႂ်းၼၢင်း မီးၸႂ် ဢီးလူၵဝ်ၸဝ်ႈၼႆၵေႃႈ သဵၼ်ႈတၢင်းသွင်သဵၼ်ႈၼႆႉ မႂ်းၶႂ်ႈၵႂႃႇသဵၼ်ႈလႂ်ၼႆၵေႃႈ လိူၵ်ႈၵႂႃႇသေ ၷႂႃႇလႄႈ။ သဵၼ်ႈတၢင်း ဢၼ်မႂ်းဢမ်ႇၵႂႃႇၼၼ်ႉ ၵဝ်ၸဝ်ႈတေၵႂႃႇယဝ်ႉ။ တႄႇဢဝ်မိူဝ်ႈၼႆႉၵႂႃႇ ယႃႇပေႁႂ်ႈၵဝ်လႆႈႁွင်ႉဝႃႈ မႂ်းပဵၼ်မေးၵဝ်ယဝ်ႈ။ မႂ်းၵေႃႈယႃႇပေႁွင်ႉဝႃႈ ၵဝ်ပဵၼ်ၽူဝ်မႂ်းယဝ်ႉ။ ယွၼ်ႉမႂ်းသေ ၵူၼ်းၵေႃႉဢၼ် ဢမ်ႇၵိုင်ႇတၢၼ်ႇသင်ႇသွၼ်ၵဝ်ၼၼ်ႉၵေႃႈ ၵဝ်လႆႈၶၢမ်ႇပိူၼ်ႈသင်ႇသွၼ်ၵဝ်လူင်ယူႇယဝ်ႈ။ လႆႈၶၢမ်ႇတၢင်းလုၵ်ႈဢွၼ်ႇၼႆႉ ဝႆႉၵဝ် မိူၼ်ၸိူင်ႉၼင်ႇ ၶႃႈၸႂ်ႉမၼ်းၼၼ်ႉသေ သင်ႇသွၼ်ၵဝ်ယူႇယဝ်ႉ။ ၸဝ်ႈၼၢင်းဢိူၺ်း ၶႅၼ်းတေႃႇ ထွမ်ႇဢဝ် ၵႂၢမ်းၵဝ်ၸဝ်ႈသေ ၵႂႃႇယူႇတီႈ သၢင်ႇထုၵ်ႇ တီႈဢၼ်ၵုသူလ်ႇ တေတိူဝ်းတွၼ်းလႆႈၼၼ်ႉတႃႉ" ၼႆယဝ်ႉ။
ပေႃးၸဝ်ႈၼၢင်း လႆႈငိၼ်းၵႂၢမ်း ၼေႃႇၶမ်းၸဝ်ႈယဝ်ႉၼႆ မၢၵ်ႇႁူဝ်ၸႂ်မၼ်းၼၢင်း ပေႃးတၢၼ်ႇတေတႅၵ်ႇၵႂႃႇယဝ်ႉ။ ၵူၺ်းၼႃႇ ယွၼ်ႉပိူဝ်ႈပဵၼ် ၽၢႆႇၼႃႈယိင်းဢွၼ်ႇၵေႃႈ ပိူင်ၼိုင်ႈ ၵွပ်ႈဢမ်ႇႁတ်းသၢၼ်ၶတ်း ၵႂၢမ်းၼေႃႇၶမ်းၸဝ်ႈၵေႃႈ ပိူင်ၼိုင်ႈလႄႈ မၼ်းၼၢင်းဢူတ်းယိူၼ်ႉသေ လၢတ်ႈဝႃႈ "ၸဝ်ႈၶုၼ်လူင်ဢိူၺ်း ၸဵမ်မိူဝ်ႈလဵၵ်ႉတေႃႇယႂ်ႇ ႁဝ်းယူႇၸွမ်းၵၼ်မႃး ပေႃးႁိုင်မႃးၸဵတ်းႁဵင်ပီယဝ်ႉ။ မိူဝ်ႈလဵဝ်သမ်ႉ တေႁႂ်ႈဝႃႈ ဢမ်ႇၸႂ်ႈၽူႈၵဝ်ယဝ်ႉ ဢၼ်ဝႃႈၼႆႉ ၶႃႈတေႁဵတ်းႁိုဝ်ၵႂႃႇၸၢင်ႈဝႃႈလႆႈ။ ပေႃးဝႃႈ ဢမ်ႇၶႂ်ႈႁႂ်ႈၵႂႃႇၸွမ်းၼႆ ၵွပ်ႈဝႃႈၸဝ်ႈႁဝ်း ပဵၼ်ၵူၼ်းၸၢႆးမႅတ်ႈၶႃႈလႄႈၶႅၼ်းတေႃႈ ၸွမ်းသဵၼ်ႈတၢင်းၽၢႆႇၶႂႃၵႂႃႇၶႃႈလႄႈ။ ၶႃးၼၢင်းတေ ၽႄတၢင်းၵႂႃႇ တၢင်းၽၢႆႇသၢႆႉၼႆႉၶႃႈလႆ" ၼႆသေ ၵႂႃႇယဝ်ႉ။ ၵူၺ်းၼႃႇ မၼ်းၼၢင်းၵႂႃႇဢိတ်းၼိုင်ႈၵူၺ်းသေ ၵွပ်ႈပိူဝ်ႈဝႃႈ ၸႂ်မၼ်းၼၢင်း ဢမ်ႇၸၢင်ႈၽၢတ်ႇလႆႈ ၼေႃႇၶမ်းၸဝ်ႈလႄႈ ဝၢႆႇပွၵ်ႈမႃးၶိုၼ်းသေ ၵႂႃႇၸွမ်းလင် ၼေႃႇၶမ်းၸဝ်ႈထႅင်ႈယဝ်ႉ။