ၸၢတ်ႈၸဝ်ႈမႁႃႇၸၼၵ/ၶွၼ်ႈၸၢတ်ႈၵၼ်

ဝၢႆးသေ ၽြႃးပဵၼ်ၸဝ်ႈႁေႃးၼႄ ၸၢတ်ႈၸဝ်ႈမႁႃၸၼၵၵႂႃႇတီႈၵႂၢင်ႈယဝ်ႉသေ ၵွပ်ႈၵႅၼ်ႇၸဝ်ႈၶိုၼ်းၶႆႈႁုပ်ႈၶွၼ်ႈၵၼ်လႄႈ ၸင်ႇပူင်ၶေႃႈဝႃႈ-

"ရႁၢၼ်းၶဝ်ဢိူၺ်း တေႃႈလဵဝ်ၼႂ်းပၢၼ်ၼႆႉ ၵွပ်ႈၵဝ်လႆႈႁၼ် ၼိမိတ်ႈသီႇပိူင်လႄႈ ၵဝ်ႈၽြႃးၸုၼ်ႉပႅတ်ႈၶူဝ်းငိုၼ်းၶူဝ်းၶမ်းသေ ဢွၵ်ႇထိူၼ်ႇၵႂႃႇတိုဝ်းၵမ်တြႃး ၵူၺ်းဢမ်ႇၸႂ်ႈ။ မိူဝ်ႈၵွၼ်ႇ ပူၼ်ႉမႃးၼၼ်ႉၵေႃႈ ၵွပ်ႈလႆႈထူပ်းမႃး ၼိမိတ်ႈသီႇပိူင်လႄႈ ပွႆႇပႅတ်ႈမႃး ၶူဝ်းငိုၼ်းၶူဝ်းၶမ်း ႁၢင်ႈႁေႃ ဝၢၼ်ႈမိူင်းသေယဝ်ႉ ယၢမ်ႈဢွၵ်ႇထိူၼ်ႇသေ တိုဝ်းၵမ်တြႃးမႃးယဝ်ႉဢိူဝ်ႈ" ၼႆ ၵႅၼ်ႇၸဝ်ႈၶွတ်ႇယွတ်ႈ လူပ်းလင်ၵႂႃႇၸိူင်ႉၼႆသေ သိုပ်ႇၶွၼ်ႈၸၢတ်ႈၵၼ်ဝႃႈ -

(1) မိူဝ်ႈၵဝ်ပဵၼ်ၶုၼ်မႁႃႇၸၼၵၼၼ်ႉ ၼၢင်းၽီမၼိမေႇၶလႃႇ ဢၼ်ဢုမ်ႈၵဝ်ဢွၵ်ႇၼမ်ႉ သမုတ်ႉတရႃႇမႃးသေ ဢဝ်ၵႂႃႇဝႆႉတီႈမင်ႇၵလႃႇသူၼ်သိူဝ်း မိူင်းမိထိလႃႇၼၼ်ႉ တေႃႈလဵဝ်သမ်ႉ မႃးပဵၼ် လုၵ်ႈယိင်းသထေး ၼႂ်းသႃႇဝတ်ႉထိၼႆႉသေ မႃးႁဵတ်းၸဝ်ႈရႁၢၼ်း ၼႂ်းသႃႇသၼႃႇ ၵဝ်ၽြႃးၼႆႉသေယဝ်ႉ ပဵၼ်ရႁၢၼ်းၼၢင်းယိင်း ဢၼ်ၸိုဝ်ႈဝႃႈ ဢုပ်ပဝၼ်ၼႃႇထေႇရီႇယဝ်ႈ။ ၵွပ်ႈလႆႈပွင်ထႅမ်ပႃႇရမီႇမႃးၼိုင်ႈသႅၼ်ၵမ်ႇၽႃႇလႄႈ ၼႂ်းၵႃႈတပႄးၼၢင်းယိင်းတင်းသဵင်ႈ မၼ်းမႅတ်ႈတွၼ်းပိူၼ်ႈထူၼ်ႈသွင် ၽၢႆႇသၢႆႉမိုဝ်းၵဝ်ၽြႃးယဝ်ႈ။

(2)ယိင်းဢွၼ်ႇ ၵေႃႉတိုဝ်းဝႅၼ်ၶမ်း တီႈ ဝဵင်းထူႇၼ မိူဝ်ႈၵမ်းၼၼ် ဢၼ်သင်ႇသွၼ်ၵဝ်ရႁၢၼ်းၼၼ်ႉ တေႃႈလဵဝ်သမ်ႉ မႃးပဵၼ်ၼၢင်းႁေႃၶမ်း ၶုၼ်ပိမ်မိသႃႇရ ဢၼ်ဢုပ်ႉပိူင်ႇမိူင်းရႃႇၸၵႁၼႆႉယဝ်ႉ။ ဝၢႆးမႃး ၶဝ်ႈႁဵတ်း ရႁၢၼ်းၼၢင်းယိင်းသေ လႆႈၸိုဝ်ႈဝႃႈ ၶေႇမႃႇထေႇရီႇ ဢၼ်လႆႈထမ်းၶိုၵ်ႉ ၶိပ်ပႃႇꧤိၺ်ၺႃႇသေ ၼႂ်းၵႃႈ တပႄးရႁၢၼ်းၼၢင်းယိင်း တင်းသဵင်ႈၼၼ်ႉ ပဵၼ်ၵႂႃႇတပေးဢၼ်မႅၼ်ႈတွၼ်းပိူၼ်ႈ ယူႇၽၢႆႇၶႂႃမိုဝ်းၵဝ်ၽြႃးယဝ်ႈ။

(3)ရႁၢၼ်းၼႃႇရတ ဢၼ်တူၺ်းထိုင်ၵဝ် တႃႇႁႂ်ႈၵဝ်ၸၢင်ႈမၼ်းၵိုမ်းၵႂႃႇ ၼႂ်းၽဝရႁၢၼ်းၼၼ်ႉ တေႃႈလဵဝ်သမ်ႉ မႃးပဵၼ်လုၵ်ႈၸၢႆး သထေးထၢၼ်ႈၵေႃးလိတ ႁိမ်းမိူင်းရႃႇၸၵႁသေ မႃးႁဵတ်းၸဝ်ႈရႁၢၼ်း ၼႂ်းသႃႇသၼႃႇၵဝ်ၽြႃးၼႆႉသေယဝ်ႉ ႁဵၵ်ႉၸိုဝ်ႈဝႃႈ ၸဝ်ႈမွၵ်ႉၵလႃႇၼ ယူႇၽၢႆႇသၢႆႉမိုဝ်း ၸဝ်ႈဢၼ်မႅတ်ႈတွၼ်းပိူၼ်ႈ ထူၼ်ႈသွင်ၼၼ်ႉယဝ်ႉ။

(4)ရသေးၼႃႇရတ ဢၼ်သင်ႇသွၼ်ၵဝ် တႃႇႁႂ်ႈမၼ်ႈၵိုမ်းၵႂႃႇ ၼႂ်းၽဝရႁၢၼ်းမိူဝ်ႈၵမ်းၼၼ် တေႃႈလဵဝ်မႃးပဵၼ် လုၵ်ႈၸၢႆးဝင်ႇၵၼ်ႇတပုၼ်ႇၼႃး တီႈဝၢၼ်ႈဢုပတိသ်သ ႁိမ်းမိူင်းရႃႇၸၵႁသေ မႃးႁဵတ်းၸဝ်ႈရႁၢၼ်း ၼႂ်းသႃႇသၼႃႇၵဝ်ၽြႃးၼႆႉသေယဝ်ႉ ႁဵၵ်ႉၸိုဝ်ႈဝႃႈ သႃႇရိပုတ်ႉတရႃႇ ဢၼ်မႅတ်ႈတွၼ်းပိူၼ်ႈ ယူႇၽၢႆႇၶႂႃမိုဝ်းၵဝ်ၽြႃးယဝ်ႉ။

(5)ၸဝ်ႈၵၢင်ႇ တီႈဝဵင်းထူႇၼ ၵေႃႉႁဵတ်းႁႂ်ႈၵဝ် မၼ်ႈၵိုမ်းၵႂႃႇၼႂ်းၽဝရႁၢၼ်းမိူဝ်ႈၵမ်းၼၼ် တေႃႈလဵဝ်သမ်ႉမႃးပဵၼ် လုၵ်ႈၸၢႆးမႄႈၼႃႉၵဝ် ၼႂ်းမိူင်းၵပိလဝတ်ႈၼႆႉသေ ၶဝ်ႈႁဵတ်းၸဝ်ႈရႁၢၼ်းၼႂ်းသႃႇသၼႃႇ ၵဝ်ၽြႃးၼႆႉသေယဝ်ႉ ႁဵၵ်ႉၸိုဝ်ႈဝႃႈ ဢႃႇၼၼ်ႇတႃႇ ၵေႃႉလုမ်းလႃးၵဝ်ၽြႃးယဝ်ႉ။ လိူဝ်သေၵဝ်ၽြႃး မၼ်းၸဝ်ႈသဵင်ဝၢၼ်တွၼ်းပိူၼ်ႈယဝ်ႈ။

(6)ၸဝ်ႈၼၢင်းၸုမ်ႈလူင် သီႇဝလိ မိူဝ်ႈၵမ်းၼၼ် တေႃႈလဵဝ် မႃးပဵၼ်လုၵ်ႈသၢဝ် ဢူႈလွင်ၵဝ်ၶုၼ်လူင် မိူင်းၻေႇဝတႁသေ မိူဝ်ႈၽွင်းၵဝ်ၸၢမ်ႇပူၺ်ႇ ႁၢင်ႈႁေႃၼႂ်းမိူင်းၵပိလဝတ်ႈၼၼ် ပဵၼ်ၼၢင်းၸုမ်ႈ ယသေႃႇထရႃႇသေ ဝၢႇးႁဵတ်းရႁၢၼ်းယဝ်ႉၼၼ်ႉ ႁဵၵ်ႉၸိုဝ်ႈဝႃႈ ပိမ်ႇပႃႇထေႇရီႇယူႇယဝ်ႉ။

(7)ၸဝ်ႈၸၢႆးတီႇၶႃႇဝုမိူဝ်ႈၵမ်းၼၼ် မႃးပဵၼ်လုၵ်ႈၸၢႆးၸဝ်ႈၼၢင်းယသေႃႇထရႃႇသေ မိူဝ်ႈဢႃႇယုမၼ်းလႆႈၸဵတ်းၶူပ်ႇၼၼ်ႉ ႁဵတ်းၸဝ်ႈသၢင်ႇသေယဝ်ႉ ႁဵၵ်ႉၸိုဝ်ႈဝႃႈ သၢင်ႇရႃႇႁုလႃႇ တပႄးၸဝ်ႈသႃႇရိပုတ်ႉတရႃႇယဝ်ႈ။

(8)ပေႃႈမႄႈ ၸဝ်ႈၶုၼ်မႁႃႇၸၼၵ မိူဝ်ႈၵမ်းၼၼ် တေႃႈလဵဝ် သမ်ႉမႃးပဵၼ် ၶုၼ်ၼႂ်းၶိူဝ်းသႃႇၵီႇဝၢင်ႇ ဢၼ်ဢုပ်ႉပိူင်ႇ မိူင်းၵပိလဝတ်ႈ ၼႆႉယဝ်ႉ။

(9)ၸဝ်ႈၶုၼ်မႁႃႇၸၼၵ မိူဝ်ႈၵမ်းၼၼ် တေႃႈလဵဝ်သမ်ႉ မႃးပဵၼ်ၵဝ်ၽြႃး ဢၼ်ႁူႉႁၼ်တြႃးတင်းသဵင်ႈသေ ပဵၼ်သြႃႇၵူၼ်းၽီၶဝ်တင်းသဵင်ႈၼႆႉယဝ်ႉ။ ၵႅၼ်ႇၸဝ်ႈႁေႃးၼင်ႇၼႆသေ ႁုပ်ႈၶွၼ်ႈၸၢတ်ႈၸဝ်ႈၵႂႃႇယဝ်ႉႁေႃး။