ၸၢတ်ႈၸဝ်ႈမႁႃႇၸၼၵ/ဢဝ်ယိူဝ်ႈယႃႈတူၼ်ႈမႆႉ ႁဵတ်းပိူင်တႅၵ်ႈသေ ၶဝ်ႈထိူၼ်ႇၵႂႃႇ
ၶုၼ်သွင်ၸဝ်ႈၼႆႉ ၵႂႃႇၸိူင်ႉၼၼ်ႉသေ မိူဝ်ႈႁွတ်ႈထိုင်တီႈၼိုင်ႈၼၼ်ႉ လႆႈမုင်ႈႁၼ် ပႃႇထိူၼ်ႇတူၼ်ႈမႆႉယႂ်ႇလမ်းလူင် ပေႃးၶဵဝ်သွမ်ႇၸမ်ႉလူင်ယူႇယဝ်ႈ။ ၵမ်းၼၼ် ၵွပ်ႈၼေႃႇၶမ်းၸဝ်ႈ ၶႂ်ႈႁႂ်ႈၼၢင်းၸုမ်ႈ ပွၵ်ႈၶိုၼ်းမိူဝ်းလႄႈ ၸင်ႇယၵ်းဢဝ် မႂ်ယိူဝ်ႈယႃႈၼုမ်ႇသဵၼ်ႈၼိုင်ႈသေ ထၢမ်ဝႃႈ "သီႇဝလိဢိူၺ်း မႂ်းတူၺ်းၼႆႉလူး ပေႃးဢဝ်မႂ်ၼုမ်ႇၼႆႉ ၶိုၼ်းၵပ်းသႂ်ႇတူၼ်ႈမၼ်းၼႆ ၸွင်ႇၶိုၼ်းလိပ်းလႆႈမိူၼ်မိူဝ်ႈၵဝ်ႇႁႃႉ။ တေႃႈမိူၼ် မႂ်ယိူဝ်ႈၼုမ်ႇၼႆႉၼင်ႇၵဝ်ႇ ၵွပ်ႈၵဝ်ၶႂ်ႈၽိုၵ်းၵမ်ထမ်းလႄႈ ၸင်ႇပွႆႇပႅတ်ႈသူသေ ႁဵတ်းရႁၢၼ်းမႃးယဝ်ႉ ၵဝ်ဢမ်ႇမီးၸႂ်ၶႂ်ႈၶိုၼ်းယူႇႁူမ်ႈလူၺ်ႈ မႂ်းထၢင်းထႅင်ႈယဝ်ႈ။ ၵဝ်တေယူႇသဝ်းၵႂႃႇ တီႈၼႂ်းထိူၼ်ႇႁိမဝၼ်ႇတႃႇၵေႃႉလဵဝ် ၸိူင်ႉၼင်ႇမႂ်ယိူဝ်ႈယႃႈ ဢၼ်ၶၢတ်ႇတူၼ်ႈမၼ်းၼႆႉၵႂႃႇၵွၼ်ႇ။ မႂ်ႈၵေႃႈ ပေႃးထိုင်မႃးၸူဝ်ႈပၢၼ် ထုၵ်ႇလႆႈငိၼ်းၸၢင်ၶူဝ်းလဵင်းၸေးၸိမ်ႇၵတ်းယဵၼ်ယဝ်ႉ။ မႂ်းတေႃႈယူႇသဝ်းၵႂႃႇ ၵေႃႉလဵဝ်သေ ၽိုၵ်းသၢင်ႈတိုဝ်းၵမ်ထမ်းၵႂႃႇတႃႉ" သင်ႇသွၼ်ၼင်ႇၼႆ။ ပေႃးၼၢင်းၸုမ်ႈသီႇဝိ လႆႈငိၼ်းၼႆ ဝူၼ်ႉဝႃႈ "မၼ်းတေပႅတ်ႈၵဝ်ၵႂႃႇတႄႉသေ တေၶဝ်ႈထိူၼ်ႇၵႂႃႇယဝ်ႉလူင်ဢေႉ။ ပႄႉမႃးဝႃႈလႆႈပေႃးပဵၼ်ထၢၼ်ႇၼႆႉ" ၼႆသေ ပဵၼ်ဢၼ်မႆႈၸႂ် ယိၼ်းၶေႃးၶူမ်ၼႃႇလႄႈ ဢဝ်မိုဝ်းထုပ်ႉဢူၵ်းၸဝ်ႈၵဝ်ႇသေ လူမ်ႉလိုမ်းတူဝ်ၵႂႃႇ ပေႃးၼင်ႇတူၼ်ႈၵူၺ်ႈ ဢဝ်ငဝ်ႈမၼ်း ၶၢတ်ႇၵႂႃႇၼၼ်ႉယဝ်ႈ။ ၵမ်းၼၼ် ပေႃးၼေႃႇၶမ်းၸဝ်ႈ ႁူႉဝႃႈ ၼၢင်းၸုမ်ႈလိုမ်းတူဝ်ၼႆ သွတ်ႉသႅၼ်ႉလပ်ႉႁွႆးတိၼ်သေ သွင်ႉပၢႆႈ ၶဝ်ႈထိူၼ်ႇၵႂႃႇယဝ်ႉ။ ၽွင်းမိူင်းၶဝ်ၵေႃႈ ယွၼ်ႇၸႂ်သေ ဢမ်ႇၸွမ်းၼေႃႇၶမ်းၸဝ်ႈ ၵႂႃႇထႅင်ႈယ်ႉ၊ ၵူၺ်းၵႂႃႇၸုတုမ်ၵၼ် တီႈၼၢင်းၸုမ်လူင် လိုမ်းတူဝ်ၼၼ်ႉသေ ဢဝ်ၼမ်ႉၽႅတ်းပၼ်၊ မိပ်ႇတိၼ်မိပ်ႇမိုဝ်းပၼ်သေ လုမ်းလႃးဝႆႉယူႇယဝ်ႉ။ မိူဝ်ႈၼၢင်းၸုမ်ႈလူင် ႁူႉတူဝ်မႃးသေယဝ်ႉ ထၢမ်ၽွင်းမိူင်းၶဝ်ဝႃႈ "ၽွင်းမိူင်းၶဝ်ဢိူၺ်း ၸဝ်ႈၶုၼ်လူင် ၵႂႃႇမီးတီႈလႂ်ယဝ်ႉ" ဝႃႈၼႆ။ ၽွင်းမိူင်းၶဝ်ၵေႃႈ ၸင်ႇတွပ်ႇဝႃႈ "ႁဝ်းၶႃႈတိုၵ်ႉမီးၵႆလႄႈ ၸဝ်ႈၶုၼ်လူင် ၵႂႃႇတီႈလႂ်ၵေႃႈ ဢမ်ႇတၼ်းႁၼ်ၶႃႈ" ၼႆယဝ်ႉ။ ၼၢင်းၸုမ်ႈလူင်ပူင်ဝႃႈ "ၽွင်းမိူင်းၶဝ်ဢိူၺ်း သူၵႂႃႇသွင်ႈႁႃႁႂ်ႈမၼ်းႁၼ် ၸဝ်ႈၶုၼ်လူင်ႁဝ်းလႄႈ" ဝႃႈၼႆ။ ၽွင်းမိူင်းၶဝ်ၵေႃႈ ၵွပ်ႈဢမ်ႇလိူဝ်လႆႈၵႂၢမ်းပူင် ၼၢင်းၸုမ်ႈလူင်လႄႈ ၽေၵူၼ်းၵၼ်သေ သွၵ်ႈႁႃၼႂ်းထိူၼ်ၼၼ်ႉ တီႈၼိုင်ႈယဝ်ႉတီႈၼိုင်ႈၵေႃႈ ဢမ်ႇႁၼ်။ တေႃႈႁွႆးတိၼ်ၵေႃႈ ဢမ်ႇႁၼ်ယဝ်ႉလႄႈ ၸင်ႇၶိုၼ်းပွၵ်ႈမႃးသေ တၢင်ႇလဝ်ႈထိုင် ၸဝ်ႈၼၢင်းၸုမ်ႈယဝ်ႉ။
ၵမ်းၼၼ် ၸဝ်ႈၼၢင်းၸုမ်ႈလူင်ၼႆႉ ႁွင်ႉႁႆႈထိုင်ၸႂ်ထိုင်ၶေႃးယဝ်ႉသေ ႁဵတ်းၵွင်းမူးဝႆႉ တီႈၼေႃႇၶမ်းၸဝ်ႈၸုၵ်းသေ ၼႄပိူင်တႅၵ်ႈယိူဝ်ႈယႃႈၼၼ်ႉ သူႇၼိုင်ႈယဝ်ႈ။ ပေႃးယဝ်ႉၵေႃႈ ဢဝ်မွၵ်ႇယႃႈၼမ်ႉႁွမ် ဝႆႈပူႇၸေႃႇၵွင်းမူးသေယဝ်ႉ ဢွၵ်ႇထိူၼ်ႇၼၼ်ႉမႃးလူၺ်ႈတင်းၽွင်းမိူင်းၶဝ်ႈယဝ်ႉ။ ၼေႃႇၶမ်းၸဝ်ႈၼႆႉ ယူႇတီႁိမဝၼ်ႇတႃႇၼၼ်ႉသေ တႅပ်းၶၢတ်ႇပႅတ်ႈ ၼႃႈၵၢၼ်လဵၵ်ႉယႂ်ႇသေလႄႈ ႁဵတ်းသမထၽႃႇဝဝၼႃႇ၊ ႁဵတ်းႁႂ်ႈ သီႇလ သမႃႇထိၽိူၵ်ႇၸိုၼ်ႈၶၢဝ်ႇသႂ်သေ ၵူၺ်းၸူဝ်ႈၶၢဝ်းတၢင်းၸဵတ်းဝၼ်းၵူၺ်း လႆႈသၢၼ်ႇဢၽိၺ်ၺႃသမႃႇပၢတ်ႈၵႂႃႇယဝ်ႈ။ ယူႇသဝ်းတီႈလွႆႁိမဝၼ်ႇတႃႇ တီႈဢၼ်ၵူၼ်းၶဝ် ဢမ်ႇႁွတ်ႈထိုင်ၼၼ်ႉ ႁင်းၵူၺ်းမၼ်းသေ ၵျေႃႇမူၼ်းသိူဝ်းလူၺ်ႈ သၢၼ်ႇလူင်ယူႇယဝ်ႈ။