ၸၢတ်ႈၸဝ်ႈမႁႃႇၸၼၵ/သြႃႇလူင်တီႉသႃႇပႃႇမွၵ်ႉၶ လႄႈ ၼၢင်းၸုမ်ႈလူင် ထူပ်းၵၼ်
ယၢမ်းၼၼ် တီႈၼႂ်းမိူင်းၼၼ်ႉ ယင်းမီးပုၼ်ႇၼႃးတိသႃႇပႃႇမွၵ်ႇၶ ၵေႃႉပဵၼ်ၶူးဝႃးပိူၼ်ႈ ၽၢႆႇပေႇတၢင်ႇၵႃႇလႃးသေဢမ်ႇၵႃး ပႃးၸဵမ်မီးဝႆႉ ၶူဝ်းၶွင်ငိုၼ်းၶမ်းၼမ်ၵေႃႉၼိုင်ႈ ဢၼ်ႁွင်ႉဝႃႈဢုတ်တိတ်ႉၸၼႆယဝ်ႈ။ မၼ်းသွၼ်ပၼ်တၢင်းမေႃပၺ်ၺႃႇ လုၵ်ႈၸဝ်ႈလုၵ်ႈၶုၼ်၊ လုၵ်ႈၽူႈမၢၵ်ႈမီး လုၵ်ႈပုၼ်ႇၼႃးၶဝ် ဢၼ်ယူႇၵူႈတီႈတီႈၵူႈလႅၼ်လႅၼ် သိပ်းၼႃႈၾႃႉ ပႅတ်ႇၼႃႈမိူင်းၼၼ်ႉယူႇယဝ်ႉ။ ဝၼ်းၼၼ်ႉ မိူဝ်ႈတၢမ်းၶမ်ႈ မၼ်းႁွင်ႉဢဝ်လုၵ်ႈႁဵတ်းမၼ်းႁႃႈပၢၵ်ႇၵေႃႉသေ ဢွၵ်ႇမႃးတၢင်းၽၵ်းတူဝဵင်း ၼႃႈတၢင်းၸၢၼ်း တႃႇတေၵႂႃႇဢၢပ်ႇၼမ်ႉၼၼ်ႉယဝ်ႉ။
ပေႃးဝႃႈမၼ်းမုင်ႈႁၼ် ၼၢင်းၸုမ်ႈလူင် ဢၼ်မီးႁၢင်ႈၽၢင်လဝ်း မီးယူႇတီႈၼိူဝ်သႃလႃးၼၼ်ႉၸိုင် ၵွပ်ႈဢူမုၼ်ၼေႃႇၶမ်းၸဝ်ႈႁဝ်း ၼႂ်းတွင်ႉၼၢင်းၸုမ်ႈလူင်ၼၼ်ႉလႄႈ မၼ်းၸင်ႇမီးၸႂ်မဵတ်ႉတႃႇ ႁၵ်ႉၼိူဝ်ၼၢင်းၸုမ်လူင်ၼၼ်ႉ မိူၼ်ၸိူင်ႉၼင်ႇ ၼွင်ႉယိင်းမၼ်းဢွၵ်ႇဢွၵ်ႇ ဢၼ်လႆႈၽၢတ်ႇယၢၼ်ၵၼ်ႁိုင်ၼႃႇယဝ်ႉသေ ၸင်ႇႁႃၶိုၼ်းလႆႈမႃးထူပ်းႁၼ်ၵၼ်ယဝ်ႈ။ ၵမ်းၼၼ် မၼ်းၵေႃႈၵႂႃႇၸူးၼၢင်းၸုမ်ႈသေ ထၢမ်ဝႃႈ "ၼွင်ႉယိင်းဢိူၺ်း မႂ်းၼၢင်းပဵၼ်ၵူၼ်းတီႈလႂ်ၼေႃး" ၼႆယဝ်ႉ။
ၼၢင်းၸုမ်ႈလူင်ၵေႃႈ ၸင်ႇတွပ်ႇဝႃႈ "ပီႈဢၢႆႈၶႃႈ ၶႃႈၼၢင်းႁဝ်း ပဵၼ်ၼၢင်းၸုမ်ႈလူင် ၸဝ်ႈၶုၼ်ဢရိၻ်ႉထၸၼၵၶႃႈဢေႃႈ" ၼႆ။ သြႃႇလူင်ၻိသႃႇပႃႇမွၵ်ႉၶၵေႃႈ "ၼွင်ႉယိင်းပဵၼ်ၼၢင်းၸုမ်ႈလူင်သေ ၵွပ်ႈလွင်ႈသင်လႄႈ သမ်ႉဢွၵ်ႇမႃးၶၢဝ်းတၢင်းၵႆၸိူင်ႉၼႆၵေႃႉလဵဝ်ၵူၺ်းၼေႃး" ၼႆယဝ်ႉ။
ၼၢင်းၸုမ်ႈလူင်ၵေႃႈ ၸင်ႇတွပ်ႇဝႃႈ "ပီႈဢၢႆႈၶႃႈ လွင်ႈတၢင်းဢၼ်ၶႃႈၼၢင်းႁဝ်း လႆႈမႃးတီႈမိူင်းၼႆႉၶႃႈတႄႉ ယွၼ်ႉပိူဝ်ႈဝႃႈ ၸဝ်ႈၵႅမ်မိူင်းဢၼ်ၸိုဝ်ႈႁွင်ႉဝႃႈ ၸဝ်ႈၶုၼ်ပေႃးလၸၼၵၼၼ်ႉ ၶိုၼ်းတိုၵ်းသိမ်းဢဝ်မိူင်းႁဝ်းလႄႈ ၸဝ်ႈၶုၼ်ၽူဝ်ၶႃႈၼၢင်း လႆႈသဵင်ႈၵၢမ်ႇသုတ်းမုၼ်သေ ၶႃႈၼၢင်းၵေႃႈ ၵွပ်ႈဢမ်ႇမီးတီႈပိုင်ႈဢိင်ၵေႃႈပိူင်ၼိုင်ႈ၊ ၵွပ်ႈၶႃႈၼၢင်းၶႂ်ႈလဵင်ႉလူလုမ်းလႃးလုၵ်ႈဢွၼ်ႇ ဢၼ်တိုၵ်ႉမီးဝႆႉယူႇ တီႈၼႂ်းတွင်ႉၶႃႈၼၢင်းႁဝ်းၼႆႉၵေႃႈပိူင်ၼိုင်ႈလႄႈ ၸင်ႇပၢႆႈဢွၵ်ႇႁၢင်ႈႁေႃဝၢၼ်ႈမိူင်းမႃးၵေႃႉလဵဝ်ဢေႃႈ။ မိူဝ်ႈမႃး ၵတ်ႉၵႃႈယင်းမႃးႁူပ်ႉၺႃး လေႃႉမႃႉရထႃးၸဝ်ႈပူႇၵေႃႉၼိုင်ႈသေ ၶီႇၸွမ်းမၼ်းမႃးၶႃႈလႄႈ ၶႃႈၼၢင်းၸင်ႇႁွတ်ႈထိုင်တီႈဝဵင်းၼႆႉၶႃႈယဝ်ႉ ပီႈဢၢႆႈႁဝ်း" ၼႆယဝ်ႉ။
သြႃႇလူင်ၻိသႃႇပႃႇမွၵ်ႉၶၵေႃႈ ၸင်ႇထၢမ်ဝႃႈ "ၼွင်ႉယိင်းဢိူၺ်း ၸွင်ႇမီးပီႈၼွင်ႉၸိူဝ်ႉၶိူဝ်းၼွင်ႉယိင်း တီႈၼႂ်းမိူင်းၼႆႉယူႇႁႃႉ" ၼႆယဝ်ႉ။
ၼၢင်းၸုမ်ႈလူင် ၸင်ႇတွပ်ႇဝႃႈ "ပီႈဢၢႆႈဢိူၺ်း ၶႃႈၼၢင်း ဢမ်ႇမီးပီႈၼွင်ႉၸိူဝ်ႉၶိူဝ်း တီႈမိူင်းၼႆႉၶႃႈ။ ၵူၼ်းႁူႉၸၵ်းၵေႃႈဢမ်ႇမီးၽႂ်ၶႃႈ ၼႆယဝ်ႉ။
ၵမ်းၼၼ်ႉ သြႃႇၶူးသွၼ်လူင် ၻိသႃႇပႃႇမွၵ်ႉၶ ၸင်ႇပၼ်ႁႅင်းမၼ်းၼၢင်းသေ လၢတ်ႈဝႃႈ "ၼွင်ႉယိင်းဢိူၺ်း ဢမ်ႇမီးၸိူဝ်ႉၶိူဝ်းပီႈၼွင်ႉၵၼ်၊ ဢမ်ႇမီးၵူၼ်းႁူႉၸၵ်းၵၼ်ၵေႃႈ ၼွင်ႉယိင်းယႃႇပေမႆႈၸႂ်ၼႃႈ။ ၵွပ်ႈဝႃႈ ၵဝ်ပဵၼ်ၵူၼ်းမီးငိုၼ်းၶမ်းၼမ််လႄႈ ပိူၼ်ႈႁွင်ႉၵဝ်ဝႃႈ ပရႁ်မၼမႁႃႇသႃႇလၼႆဢိူဝ်ႈ။ ၵွပ်ႈပဵၼ်ၶူးသွၼ်လူင်ပိူၼ်ႈ ၽၢႆႇပေႇတၢင်ႇၵႃႇလႃး ဢၼ်သွၼ်ပၼ် တၢ်ငႈမေႃပၺ်ၺႃႇ ႁႂ်ႈလုၵ်ႈၸဝ်ႈလုၵ်ႈၶုၼ်လုၵ်ႈၽူႈမၢၵ်ႈၵူၼ်းမီး၊ လုၵ်ႈပုၼ်ႇၼႃးၶဝ် ဢၼ်ယူႇၵူႈတီႈၵူႈလႅၼ်ႇ လႄႈ ပိူၼ်ႈႁွင်ႉၵဝ်ဝႃႈ ၻိသႃႇပႃႇမွၵ်ႉၶ ၼႆယဝ်ႉ။ ၵွပ်ႈၼႆလႄႈ ၼွင်ႉယိင်းၵဝ်ႇ ယႃႇပေမႆႈၸႂ်ၵွပ်ႈတီႈယူႇတီႈသဝ်း လႄႈ လွင်ႈၼုင်ႈတၢင်းၵိၼ်ၸိူဝ်းၼႆႉ၊ ၵဝ်ၵေႃႈတေဝႆႉမႂ်းၼၢင်း မိူၼ်ၼင်ႇၼွင်ႉယိင်းၵဝ်ဢွၵ်ႇဢွၵ်ႇသေ တေလဵင်ႉလူလုမ်းလႃးမႂ်းၼၢင်းၵႂႃႇလႆ။ မႂ်းၵေႃႈတေႃႈဝႆႉၵဝ် မိူၼ်ၼင်ႇ ပီႈၸၢႆးမႂ်းဢွၵ်ႇဢွၵ်ႇတႃႉ၊ တေႃႈလဵဝ်မႂ်းၼၢင်း ၵွတ်ႇတိၼ်ၵဝ်ဝႆႉမၼ်ႈမၼ်ႈသေ သမ်ႉႁွင်ႉႁႆႈသေဝႃႈ "ပီႈဢၢႆႈဢိူၺ်း ၵွပ်ႈပိူဝ်ႈဝႃႈႁႃးပီႈၼွင်ႉ ၽႂ်ၵေႃႈဢမ်ႇလုဢမ်ႇတၢႆလႄႈ ၸင်ႇလႆႈထူပ်းၵၼ်ၶိုၼ်းယဝ်ႉ' ၸိူင်ႉၼႆလႄႈ" ၼႆ။
ၼၢင်းၸုမ်ႈလူင်ၵေႃႈ ႁွင်ႉႁႆႈၸိူင်ႉၼင်ႇၶူးသွၼ်လူင် ၻိသႃႇပႃႇမွၵ်ႉၶမွၵ်ႇၼႄယဝ်ႉ။ သြႃႇလူင်ၻိသႃႇပႃႇမွၵ်ႉၶၵေႃႈ ႁႆႈသေ လၢတ်ႈဝႃႈ "ၼွင်ႉယိင်းၵဝ်ၼႆႉ ၵွပ်ႈပိူဝ်ႈဝႃႈ ၽႂ်ၵေႃႈ ဢမ်ႇတၢႆဢမ်ႇႁၢႆလႄႈ ႁႃးၸင်ႇၶိုၼ်းလႆႈမႃးထူပ်းႁၼ်ၵၼ်ယဝ်ႉ" ၼႆယဝ်ႉ။
ပေႃးဝႃႈ လုၵ်ႈႁဵၼ်းၸိူဝ်းၼၼ်ႉ လႆႈငိၼ်းသွင်ၶႃၸိူင်ႉၼၼ်ယဝ်ႉၵေႃႈ ၸင်ႇဢွၼ်ၵၼ်လႅၼ်ႈမႃးၸူးတီႈသွင်ၶႃသေ ဢွၼ်ၵၼ် ထၢမ်ဝႃႈ "သြႃႇၶူးသွၼ်လူင်ႁဝ်း ႁႆႈႁဵတ်းသင်ၶႃႈ" ၼႆယဝ်ႉ။
သြႃႇၶူးသွၼ်လူင်ၻိသႃႇပႃႇမွၵ်ႉၶၵေႃႈ ၸင်ႇတွပ်ႇဝႃႈ "လုၵ်ႈႁဵၼ်းၶဝ်တၢင်းသဵင်ႈဢိူၺ်း ၵွပ်ႈပိူဝ်ႈဝႃႈ ၵဝ်ၶိုၼ်းလႆႈထူပ်းႁၼ် ၼွင်ႉယိင်းၵဝ် ဢၼ်လႆႈၽၢတ်ႇယၢၼ်ၵၼ်ၵႂႃႇ ပီယၢဝ်းၶၢဝ်းႁိုင်ၼႆႉသေ ၵွပ်ႈၵဝ်ၸူမ်းသိူဝ်းၼႃႇဢႃးလႃးလႄႈ ၵဝ်ၸင်ႇႁႆႈယဝ်ႉဢိူဝ်ႈ" ၼႆ။
လုၵ်ႈႁဵၼ်းၸိူဝ်းၼၼ်ႉ ဢွၼ်ၵၼ်သိုပ်ႇလၢတ်ႈဝႃႈ "သြႃႇၶူးသွၼ်လူင်ႁဝ်းၶႃႈ လႆႈၶိုၼ်းထူပ်းႁၼ်ၼွင်ႉယိင်းၼႆႉ လီတႄႉၶႃႈဢေႃႈ။ ၶူးသွၼ်လူင်ႁဝ်း ၶႆႈၸႂ်ႉၸိူင်ႉႁိုဝ်ၼႆၵေႃႈ လၢတ်ႈမႃးၶႃႈလႄႈ ၶႃႈႁဝ်းၶဝ် တေၸွႆႈႁဵတ်းပၼ်ယူႇၵူၺ်း။ ပႃႇပေမႆႈၸႂ်သင်ၶႃႈ" ၼႆယဝ်ႉ။
သြႃႇၶူးသွၼ်လူင်ၻိသႃႇပႃႇမွၵ်ႉၶၵေႃႈ ၸင်ႇလၢတ်ႈဝႃႈ "လုၵ်ႈႁဵၼ်းၶဝ်တင်းသဵင်ႈဢိူၺ်း ပေႃးၼၼ်ၵေႃႈ ၼႂ်းသူႁႃႈပၢၵ်ႇၼႆႉ ၵေႃႉၼိုင်ႈ မိူင်းဢဝ်လေႃႉမႃႉရထႃး ဢၼ်မီးပႃးႁိူၼ်းမၼ်းၼၼ်ႉမႃးလူး" ၼႆ။ ပေႃးဝႃႈ လေႃႉမႃႉရထႃးႁွတ်ႈမႃးထိုင်ယဝ်ႉၵေႃႈ ၸင်ႇၸႂ်ႉႁႂ်ႈၼၢင်းၸုမ်ႈလူင် ၶိုၼ်ႈၶီႇဝႆႉ ၼိူဝ်လေႃႉမႃႉရထႃးၼၼ်ႉသေယဝ်ႉ သင်ႇလၢတ်ႈလုၵ်ႈႁဵၼ်း ဢၼ်ဢဝ်လေႃႉမႃႉရထႃးမႃးၼၼ်ႉဝႃႈ "လုၵ်ႈႁဵၼ်းၵဝ်ဢိူၺ်း မႂ်းမိူဝ်းလၢတ်ႈၼႄ မေးၵဝ်ၼၢႆးပုင်ႇၼႃးတီႈႁိူၼ်းလူး။ မွၵ်ႇဝႃႈ ၼၢင်းယိင်းၵေႃႉၼႆႉ မၼ်းပဵၼ်ၼွင်ႉယိင်းၵဝ်ႇၼႆၼႃႈ။ လၢတ်ႈၼႄလွင်ႈဝႃႈ ႁႃးသွင်ၵေႃႉလႆႈၽၢတ်ႇယၢၼ်ၵၼ်ၵႂႃႇႁိုင်ၼႃႇယဝ်ႉသေ ၸင်ႇၶိုၼ်းလႆႈမႃးထူပ်းႁၼ်ၵၼ် တီႈသႃလႃးမိူဝ်ႈၼႆႉလႄႈ ၵဝ်ၸင်ႇၶိုၼ်းႁွင်ႉဢဝ်ၼွင်ႉယိင်းၵဝ်ၼႆႉ ၶိုၼ်းမႃးယူႇၸွမ်းတီႈၼႆႈၼႆႉဢိူဝ်ႈ" ၼႆသေ ၸႂ်ႉသူင်ႇၵႂႃႇတီႈႁိူၼ်းမၼ်းယဝ်ႉ။