ၸၢတ်ႈၸဝ်ႈမႁႃႇၸၼၵ/ပွႆႇရထႃးၽုသ်ႉသ ႁႃၸဝ်ႈၶုၼ်

တီႈၼႂ်းပၢင်ၵုမ် ၽွင်းမိူင်း ပုၼ်ႇၼႃး ပရေႃးႁိတ်ႉၶဝ်ၼၼ်ႉ ပေႃးဝႃႈဝူၼ်ႉႁႃတူၺ်း ဢၼ်ၵိုင်ႇထိူၵ်ႈၵၼ် တင်းလုၵ်ႈယိင်းၸဝ်ႈၶုၼ်ၼၼ်ႉ ဢမ်ႇလႆႈယဝ်ႉၵေႃႈ ပုၼ်ႇၼႃးပရေႃးႁိတ်ႉၸင်ႇဝႃႈ "ၽွင်းမိူင်းဢွၼ်ႇ ၽွင်းမိူင်းလူင်ၶဝ်ဢိူၺ်း ႁဝ်းဢွၼ်ၵၼ်ဝူၼ်ႉႁႃ လွင်ႈၼႆႉလၢႆလၢႆးယူႇၵေႃႈ ဢမ်ႇႁၼ်ၵေႃႉလႂ်ဢၼ်ဝႃၼၼ်ႉ တႅၵ်ႇလႅင်းလီၼႃႇယဝ်ႉ။ ဢဝ်ၵမ်ႈမၼ်းထိူၵ်ႈသေ ၵူၺ်းလူဝ်ႇပွႆႇဢွၵ်ႇရထႃးၽုသ်သယဝ်ႉ။ သင်ဝႃႈ ရထႃးၽုသ်သၼႆႉ ဢဝ်လႆႈမႃးၶုၼ်ၼႆၸိုင် တေပဵၼ် ၽူႈမီးၽုင်းမုၼ်ယႂ်ႇ ဢၼ်ဢုပ်ႉပိူင်ႇသိမ်းဢဝ်လႆႈ ၵုၼ်ၸမ်ႇပူႇတီႇပႃႇတင်းသဵင်ႈယူႇယဝ်ႉ။ ဢၼ်ၼႆႉ သူတေဝႃႈႁိုဝ်။ ၸွင်ႇလႆႈၸႂ်ၼႄႇ” ထၢမ်ၼင်ႇၼႆယဝ်ႉ။

ၽွင်းမိူင်းၶဝ်တၢင်းလၢႆၵေႃႈ ပေႃးဝႃႈလႆႈငိၼ်းၵႂၢမ်း ပုၼ်ႇၼႃႇပရေႃးႁိတ်ႉၸိုင် လႆႈၸႂ်ၵႂၢမ်းသြႃႇပရေႃးႁိတ်ႉသေ ၸင်ႇဝႃႈ "ဢၼ်သြႃႇပရေႃးႁိတ်ႉဝႃႈၼႆႉ သင်ႇထုၵ်ႇတႄႉ” ၼႆသေ ၽွမ်ႉလႆႈၸႂ်ၵၼ် တႃႇတေ ပွႆႇဢွၵ်ႇရထႃးၽုသ်သယူႇယဝ်ႉ။

ၵမ်းၼၼ် ၽွင်းမိူင်းပရေႃးႁိတ်ႉၶဝ် ၸႂ်ႉႁႂ်ႈၶပ်ႉၶိုင် ဢၼ်လူဝ်ႇႁဵတ်းလူင်ႇပွင် တီႈၼႂ်းဝဵင်းတင်းသဵင်ႈၸိူဝ်းၼၼ်ႉ ၶႅမ်ႉလႅပ်ႈႁၢင်ႈလီယဝ်ႉသေ ႁၢင်ႈႁႅၼ်းတႃႇတေပွႆႇရထႃးၽုသ်သ ဢၼ်ႁၢင်ႈလီ၊ မီးမင်ႇၵလႃႇ တင်ႈၶိူင်ႈၶူဝ်းၶုၼ်ႁႃႈယိူင်ႈၵႂႃႇယဝ်ႈ။ သမ်ႉႁၢင်ႈလေႃႉရထႃးၶပ်ႉထႅဝ်ၵၼ်သေ ဢဝ်တပ်ႉၸၢင်ႉ၊ တပ်ႉမႃႉ၊ တပ်ႉရထႃး၊ တပ်ႉသိုၵ်းႁၢၼ် မူႇသိုၵ်းသီႇယိူင်ႈသေ ၶႅပ်ႇၶၢင်ႈလွမ်ႉၸွမ်း တၢင်းၼႃႈ တၢင်းလင်ၽၢႆႇသၢႆႉၽၢႆႇၶႂႃႇသေလႄႈ ႁၢင်ႈႁႅၼ်းဝႆႉ တႃႇတေပွႆႇၶဝ်ႈၵႂႃႇ ၸွမ်းသဵၼ်ႈတၢင်းၼႂ်းဝဵင်ႈယဝ်ႈ။ လိူဝ်ၼၼ်ႉ သမ်ႉပႃးတင်း ၵွင်ပီႇတႄႇၵႂႃႇ ဢၼ်ဝႃႈ တူရိယႃႇႁႃႈယိူင်ႈၸွမ်းယဝ်ႈ။ ၶဝ်သင်ႇလၢတ်ႈႁင်းၵၼ်ဝႃႈ "မိူဝ်ႈလဵဝ် ယႃႇၽူမ်ႈႁႆႇတိုင်ႈ၊ ပေႃးထူပ်းၺႃး ၵေႃႉတေပဵၼ်ၸဝ်ႈၶုၼ်ၵွၼ်ႇ ၸင်ႇတေႁႆႇတိုင်ႈ” ၼႆယူႇ။

ပေႃးဝႃႈ ႁၢင်ႈႁႅၼ်းၸိူင်ႉၼၼ်ယဝ်ႉၵေႃႈ ပုၼ်ႇၼႃးပရေႃးႁိတ်ႉၶဝ်ၼႆႉ ဢဝ်တင်းၵွၵ်းၶမ်းသေ ၸုမ်းၼိုင်ႈယူႇၽၢႆႇၶၢင်ႈ၊ ၸုမ်းၼိုင်ႈယူႇတၢင်းၼႃႈရထႃး၊ ၸုမ်းၼိုင်ႈ ယိပ်းတင်းၶွၼ်ႉၶမ်းႁဵတ်းၼႆသေ ဢွၼ်ၵၼ် ၽႅတ်းၼမ်ႉသေယဝ်ႉ ဢတိတ်ႉထၢၼ်ႇဝႃႈ “ၵေႃႉဢၼ်မီး ၽုင်းၵၢမ်ႇ ထိူၵ်ႈႁပ်ႉၸေးၸိမ်ႇၸိုင်ႈမိူင်းၼႆႉ တေမီးယူႇ၊ ရထႃးၼႆႉ ၶႅၼ်းတေႃႈၵႂႃႇၸူး ၵေႃႉဢၼ်တေပဵၼ်ၶုၼ်ၼၼ်ႉသေၵမ်း” ၼႆသေ ပွႆႇထရထႃးၽုသ်သၵႂႃႇယဝ်ႉ။

ၵမ်းၼၼ်လေႃႉရထႃးၽုသ်ၵေႃႈၵေႃႈပေႃးပၼ်ႇႁွပ်ႁေႃယဝ်ႉ ၸွမ်းတၢင်းလူင်ၼႂ်းဝဵင်သေ ပၼ်ႇႁွပ်ႈဝဵင်းၵႂႃႇၽၢႆႇၶႂႃယဝ်ႉ။ မိူဝ်ႈၽွင်းတိုၵ်ႉပၼ်ႁွပ်ႈဝဵင်းယူႇၼၼ်ႉ မီးႁူဝ်သိုၵ်းလူငၵေႃႉၼိုင်ႈ ဢၼ်လႆႈၶၢမ်ႇလုၵ်ႈယိင်းၶုၼ် ပၼ်တၢမ်ႇမႃးမိူဝ်ႈဢွၼ်တၢင်းၼၼ်ႉပေႃးဝႃႈ ႁၼ်ရထႃးမႃးၼိူဝ်သဵၼ်ႈတၢင်း ၵၢင်ဝဵင်းၼၼ်ႉၸိုင် ၵိူဝ်းထၢင်ႇဝႃႈ ရထႃးယိူင်းၸူးႁိူၼ်းမၼ်းၼလႄႈ လွမ်ဝူၼ်ႉဝႃ “ၵဝ်ၼႆႉၼႆ တေပဵၼ်ၶုၼ်မိူင်းယဝ်ႉ” ၼႆသေ မွင်းပႂ်ႉတူၺ်းယူႇယဝ်ႉ။

ပေႃးဝႃႈရထႃးပူၼ်ႉႁိူၼ်းမၼ်းၵႂႃႇၸိုင် ဢဝ်ထၢတ်ႈၸႂ်မၼ်းတူၵ်းၵႂႃႇယဝ်ႉ။ ဝၢႆးၼၼ်ႉ ၽူႈမၢၵ်ႈလူင်ၵေႃႉၼိုင်ႈၵေႃႈ ပေႃးဝႃႈႁၼ်ရထႃးမႃးၼႆၵေႃႈ တေႃႈဝူၼ်ႉၸိူင်ႉၼင်ႇ ႁူဝ်သိုၵ်းလူင်ၼင်ႇၵဝ်ႇယဝ်ႉ။ ပေႃးဝႃႈရထႃး ပူၼ်ႉႁိူၼ်းၸိူဝ်းၼၼ်ႉသေ ပၼ်ႇႁွပ်ႈဝဵင်းယဝ်ႉၵေႃႈ ဢွၵ်ႇၵႂႃႇၽၵ်းတူၼႃႈတၢင်းဢွၵ်ႇ ၵႂႃႇၸူး ၼေႃႇၶမ်းၸဝ်ႈ ဢၼ်မီးတီႈ သူၼ်သိူဝ်းၽႂ်းၽႂ်းယူႇယဝ်ႉ။

ယၢမ်းၼၼ် ၽွင်းမိူင်းၶဝ်ၸင်ႇထၢမ်ဝႃႈ "သြႃႇပရေႃးႁိတ်ႉဢိူၺ်း မိူဝ်ႈလဵဝ်ပူၼ်ႉဝဵင်းမႃးယဝ်ႉ။ ရထႃးၵေႃႈ ပႄႉမႃးၵႂႃႇၽႂ်း ပေႃးႁႂ်ႈရထႃးၼႆႉ ၶိုၼ်းဝၢႆႇမိူဝ်း ၸွင်ႇဢမ်ႇလီၶႃႈႁႃႉ” ၼႆယဝ်ႉ။ ပရေႃးႁိတ်ႉၵေႃႈ ၸင်ႇလၢတ်ႈဝႃး "ၽွင်းမိူင်းၶဝ်ဢိူၺ်း သူလၢတ်ႈသင်ယူႇလႃႇ၊ မၼ်းၶႂ်ႈၵႂႃႇတေႃႇထိုင်ပၢၵ်ႇၵေႃႈ ပွႆႇမၼ်းၵႂႃႇလႄႈ။ မၼ်းဢမ်ႇသင်ႇထုၵ်ႇ တႃႇတေၶိုၼ်းဝၢႆႇပွၵ်ႈမိူဝ်း” ၼႆ။ ရထႃႈၵေႃႈ ပေႃးဝႃႈ ၵႂႃႇၶပ်ႉတၢမ်းၵၼ်သေ ၶဝ်ႈၼႂ်းသူၼ်သိူဝ်းယဝ်ႉၼႆ ပၼ်ႇႁွပ်ႈမၢၵ်ႇႁိၼ် တီႈဢၼ်ၼေႃႇၶမ်းၸဝ်ႈ ၼွၼ်းဝႆႉယူႇၼၼ်ႉယဝ်ႈ။ ရထႃးၵႂႃႇၵိုတ်းဝႆႉ ပေႃးတၢၼ်ႇၶပ်းၶိုင်ဝႆႉ တႃႇႁႂ်ႈ ၼေႃႇၸဝ်ႈ ၶိုၼ်ႈၼိူဝ်လေႃႉရထႃးၼၼ်ႉယဝ်ႉ။

ၵမ်းၼၼ် ပေႃးပုၼ်ႇၼႃးပရေႃးႁိတ်ႉႁၼ် ၼေႃႇၶမ်းၸဝ်ႈသုမ်ႇႁူဝ်သေ ၼွၼ်းယူႇၼိူဝ်မၢၵ်ႇႁိၼ်ၼႆ ၸင်ႇလၢတ်ႈဝႃႈ “ၸၢႆးၶဝ်ဢိူၺ်း ၸွင်ႇသူႁၼ်ၵူၼ်းၵေႃႉၼိုင်ႈ ၼွၼ်းယူႇၼိူဝ်မၢၵ်ႇႁိၼ်ႁိုဝ်ႉ။ ၵူၼ်းၵေႃႉၼႆႉ ၸွင်ႇတေမီးၽုင်းယူႇ တႂ်ႈမုင်းၸွင်ႈၽိူၵ်ႇလႆႈ။ ဝႃႈတီႈတႄႉမၼ်း ပေႃးပဵၼ်ၵူၼ်းမီးၽုင်းၸိုင် မိူဝ်ႈႁဝ်းလွၵ်ႇမၼ်း မၼ်းတေ ဢမ်ႇတူင်ႉတိုၼ်ႇတူၵ်းၸႂ်သင်။ ၵူၺ်းတေတေႃႉတႄႉ ပိုတ်ႇၼႃႈတူၺ်းဢဝ်ယဝ်ႉ။ သင်ဝႃႈ ပဵၼ်ၵူၼ်းဢမ်ႇမီးၽုင်းၼႆ မၼ်းတေၼႅတ်ႈတူၵ်းၸႂ်သေ ပိုတ်ႇၼႃႈတူၺ်းၵမ်းလဵဝ်ယဝ်ႉ။ မိူဝ်ႈလဵဝ်ၼႆႉ ဢွၼ်ၵၼ်ႁႆႇတိုင်ႈ တူရိယႃႇႁႃႈယိူင်ႈၵမ်းလဵဝ် ႁူမ်ႈၵၼ်မူတ်းတႃႉ” ဝႃႈၼႆ။ ၵမ်းၼၼ်ႉ ၶဝ်ဢွၼ်ၵၼႁႆၷတိုင်ႈ မိူဝ်ႈလဵဝ်ၵၼ်ၵႂႃႇတင်းသဵင်ႈလႄႈ သဵင်လင်ပေႃႈတၢၼ်ႇ သဵင်ၼမ်ႉသမုၻ်တရႃႇလူၼ်ႉထင်ႇတူၵ်းသေ ဢဝ်ယွၼ်ႈလင်ၵႂႃႇၼႂ်းသူၼ်သိူဝ်းၼၼ်ႉယဝ်ႉ။

ပေႃးၼေႃႇၶမ်းၸဝ်ႈ ငိၼ်းသဵင်ႁႆႇတိုင်ႈသေ တိုၼ်ႇမႃးၸိုင် ၸင်ႇတေႃႉတႄႉ ပိုတ်ႇၽႅၼ်ႇသုမ်ႇႁူဝ်ၼၼ်ႉတူၺ်းယဝ်ႈ။ ၵွပ်ႈလႆႈႁၼ်မူႇသိုၵ်းတင်းၼမ်လႄႈ ႁူႉဝႃႈ လႅပ်ႈၶဝ်တေဢၢပ်ႈပၼ်ၸွင်ႈၽိူၵ်ႇႁႂ်ႈၵဝ်ယဝ်ႉ” ၸိူင်ႉၼႆသေ ၶိုၼ်းပိၼ်ႇလၢႆႈၼွၼ်းၵႂႃႇၽၢႆႇသၢႆႉ၊ သုမ်ႇႁူဝ်သေ ၼွၼ်းထႅင်ႈၵမ်းၼိုင်ႈယဝ်ႉ။ ပုၼ်ႇၼႃးပရေႃးႁိၼ်ႇ ၸင်ႇမႃးယူႇၸမ် တီႈၽၢႆႇတၢင်းတိၼ်သေ တူၺ်းလၵ်ႉၶၼႃႇ တီႈတိၼ်ၼေႃႇၶမ်းၸဝ်ႈလႄႈ ၸင်ႇလႆႈႁၼ်လၵ်ႉၶၼႃႇ ၵူၼ်းၸၢႆးမႅတ်ႈယဝ်ႈ။ မၼ်းႁူႉဝႃႈ "ၵူၼ်းၸၢႆးမႅတ်ႈၵေႃႉၼႆ ယႃႇဝႃႈၵုၼ်ၸမ်ႇပူႇၼႆၵွၼ်ႇ၊ သင်ဝႃႈ ႁဵတ်းပဵၼ်ၶုၼ်ၼႆၸိုင် တေႃႈၵုၼ်လူင်သီႇၵုၼ် ပႃးၸဵမ်ၵုၼ်ဢွၼ်ႇသွင်ႁဵင်ၵေႃႈ ယင်းတေသိမ်းဢဝ်လႆႈၵွၼ်ႇယဝ်ႈ။ ၵွပ်ႈမိူဝ်ႈမီးလၵ်ႉၶၼႃႇ ၵူၼ်းၸၢႆးမႅတ်ႈလႄႈ ၵိုင်ႇထိူၵ်ႈႁဵတ်းၶုၼ်ယဝ်ႉ” ဝႃႈၼႆသေ ပဵၼ်ဢၼ်ၸူမ်းသိူဝ်းတႄႉတႄႉဝႃႈဝႃႈ လႄႈ ၸင်ႇႁႂ်ႈၶိုၼ်းႁႆႇတိုင်ႈ ၵွင်ပီႇတႄႇၵႂႃႇၼၼ်ႉသေ ယွင်ႈယေႃးထႅင်ႈၵမ်းၼိုင်ႈယဝ်ႉ။

ၵမ်းၼၼ် ၼေႃႇၶမ်းၸဝ်ႈ ပိုတ်ႇၼႃႈသေ ပိၼ်ႇလၢႆႈၽၢႆႇသၢႆႉမိုဝ်းယဝ်ႉသေ တူၺ်းပရိသၢတ်ႈယူႇယဝ်ႉ။ ယၢမ်းၼၼ် ပုၼ်ႇၼႃးပရေႃးႁိတ်ႉၼႆႉ ၸင်ႇႁႂ်ႈပရိသၢတ်ႈၸူႉတုမ်ၵၼ်သေ ၵူမ်ႈႁူဝ်တၢင်ႇလၢတ်ႈဝႃႈ "ၸဝ်ႈၶုၼ်လူင်ႁဝ်း လုၵ်ႉမႃးၶႃႈလႄႈ။ ၸေးၸိမ်ႇမိူင်းဢၼ်ၼႆႉ ၽႅဝ်တီႈၼႂ်းဢူင်ႈမိုဝ်းၸဝ်ႈယဝ်ႉဢေႃႈ” ၼႆ။ ၼေႃႇၶမ်းၸဝ်ႈ မႁႃႇၸၼၵ ၸင်ႇထၢမ်ဝႃႈ “ၵေႃႉၶဝ်ဢိူၺ်း ၸဝ်ႈၶုၼ်မိူင်းၼႆႉ မီးတႂ်ႈလႂ်လႃႇ” ၼႆယဝ်ႉ။

ပုၼ်ႇၼႃးပရေႃးႁိတ်ႉၵေႃႈ ၸင်ႇလဝ်ႈဝႃႈ "ၸဝ်ႈၶုၼ်တီႈၶႃႈ ၸဝ်ႈၶုၼ်ၶႃႈႁဝ်းၶဝ် ၼွၼ်းၽေးၵႂႃႇယဝ်ႉဢေႃႈ။ မိူဝ်ႈလဵဝ်ပေႃးမီးၵႂႃႇ ၸဵတ်းဝၼ်းပၢႆပၢႆယဝ်ႉ” ၼႆယူႇ။ ၼေႃႇၶမ်းၸဝ်ႈမႁႃႇၸၼၵၵေႃႈ ၸင်ႇထၢမ်ဝႃႈ “ၵေႃႉၶဝ်ဢိူၺ်း ပေႃးၼၼ် လုၵ်ႈၸၢႆးၼွင်ႉၸၢႆးၸဝ်ႈၶုၼ်လူင်သူ ဢၼ်တေသိုပ်ႇပုတ်ႈၸၢမ်ႇႁၢင်ႈႁေႃၼၼ်ႉ ဢမ်ႇမီးသေၵေႃႉယဝ်ႉႁႃႉ” ၼႆ။ ပရေႃးႁိတ်ႉၵေႃႈ ၶိုၼ်းလဝ်ႈဝႃႈ "ၸဝ်ႈၶုၼ်တီႈၶႃႈ ဢမ်ႇမီးလုၵ်ႈၸၢႆး ၼွင်ႉၸၢႆးသေၵေႃႉ တႃႇတေၸၢမ်ႇႁၢင်ႈႁေႃႈၼႆႉ။ ၵူၺ်းၵိုတ်းလုၵ်ႈယိင်းၵေႃႉၼိုင်ႈၵူၺ်းၶႃႈ” ၼႆ။ “ၵေႃႉၶဝ်ဢိူၺ်း ပေႃးၸိူင်ႉၼၼ်ၵေႃႈ လီယဝ်ႉ” ၼႆၸင်ႇႁပ်ႉတုင်းဢဝ်သေ လုၵ်ႉၼင်ႈယူႇ ၼိူဝ်မၢၵ်ႇႁိၼ်ၼၼ်ႉယဝ်ႉ။

ၵမ်းၼၼ် ၽွင်းမိူင်းပရေႃးႁိတ်ႉၶဝ် ၸင်ႇဝႃႈ "ၸဝ်ႈၶုၼ်မႅတ်ႈၵေႃႉၼႆႉ မီးဝႆႉဢၢင်ႇၵႃႇသီႇယိူင်ႈတဵမ်ထူၼ်ႈ ၸိူင်ႉၼင်ႇၸဝ်ႈၶုၼ်လူင်ႁဝ်း သင်ဝႆႉၼၼ်ႉသေ သမ်ႉရထႃးၽုသ်သၵေႃႈ မႃးသိူၵ်ႈသႂ်ႇယဝ်ႉ။ လၵ်ႉၶၼႃႇၵူၼ်းၸၢႆးမႅတ်ႈၵေႃႈ တဵမ်ထူၼ်ႈပေႃးဢမ်ႇမီးတီႈသုတ်းသဵင်ႈတႄႉယဝ်ႈ” ၼႆ။

ၽွင်းမိူင်း လႄႈ ၵူၼ်းမိူင်းၶဝ် ပဵၼ်ဢၼ်ၸူမ်းသိူဝ်းသေ ဢဝ်ၶိူင်ႈၶုၼ်ႁႃႈယိူင်ႈ ပူင်ဢၢပ်ႈပၼ်ၼေႃႇၶမ်းၸဝ်ႈသေ ယုၵ်ႉတၢင်ႇပဵၼ် ၶုၼ်ၵႂႃႇၵမ်းလဵဝ် တီႈၼိူဝ်မၢၵ်ႇႁိၼ် ၼႂ်းသူၼ်သိူဝ်းၼၼ်ႉယဝ်ႉ။

ၶုၼ်လူင် မႁႃႇၸၼၵၼႆႉ ပေႃးဝႃႈႁပ်ႉဢဝ်မိူင်းယဝ်ႉၵေႃး ၸင်ႇၶိုၼ်ႈၶီႇၼိူဝ် လေႃႉမႃႉရထႃး ဢၼ်ႁၢင်ႈလီတႃ ပႃးၸဵမ်ၽွင်းမိူင်း ႁူမ်ႈပႃး သိုၵ်းႁၢၼ်တင်းၼမ် လွမ်ႉႁွပ်ႈၶႅပ်ႇၶၢင်ႈၸွမ်းပႃႈလင်သေလႄႈ ၶဝ်ႈၵႂႃႇၼႂ်းဝဵင်း တီႈၽၵ်းတူၼႃႈတၢင်းဢွၵ်ႇယဝ်ႈ။ ၶိုၼ်းဝႆႉႁူဝ်သိုၵ်းႁႃႈၵေႃႉ ၵမ်းဢွၼ်တၢင်းၶဝ်ၼၼ်ႉ မိူၼ်ၸၼ်ႉထၢၼ်ႈပိူင်ၵဝ်ႇသေ ၵွၼ်းမိူင်းၵႂႃႇယဝ်ႈ။

ၵမ်းၼၼ် ၵွပ်ႈၼၢင်းသႅင်သီႇဝလိ ၶႆႈၸွပ်ႇၼမ်ႉၸႂ်ၸဝ်ႈၶုၼ်မႂ်ႇ ၸိူင်ႉၼင်ႇမၼ်းၼၢင်းယၢမ်ႈၸွပ်ႇမႃး တီႈႁူဝ်သိုၵ်းလူင်ၶဝ်လႄႈ ၸင်ႇၸႂ်ႉၽူႈပွင်ၵၢၼ်ၵေႃႉၼိုင်ႈသေ လၢတ်ႈဝႃႈ “ၸၢႆးဢိူၺ်း မႂ်းၵႂႃႇၸူး တီႈၸဝ်ႈၶုၼ်လူင်သေ လၢတ်ႈဝႃႈ "ၼၢင်းသႅင်သီႇဝလိမိူင်းၼႆႉ ႁွင်ႉၸဝ်ႈၶုၼ်လူင်ႁဝ်း ႁႂ်ႈမႃးတီႈၸဝ်ႈၼၢင်းၽႂ်းၽႂ်းတေႃႈလဵဝ်ဝႃႇ” ၼႆၼႃႈ” ၼႆ။

ၵူၼ်းပွင်ၵၢၼ်ၵေႃႈ ႁဵတ်းၸွမ်းၼင်ႇ ၶေႃႈသင်ႇၼၼ်ႉသေ ၵႂႃႇတၢင်ႇလဝ်ႈတီႈၼေႃႇၶမ်းၸဝ်ႈယဝ်ႉ။ ၼေႃႇၶမ်းၸဝ်ႈၵေႃႈ ၵွပ်ႈပိူဝ်ႈဝႃႈ မီးပၺ်ႇၺႃႇတၢင်းလၵ်းလႅမ်တဵမ်ထူၼ်ႈ ဢၼ်ဢမ်ႇတႅၵ်ႈၼိူင်းလႆႈၼၼ်ႉလႄႈ ပေႃးဝႃႈ လႆႈငိၼ်းၶေႃႈၵႂၢမ်း ၼၢင်းသႅင်သီႇဝလိႁွင်ႉၼႆ ၸင်ႇဝူၼ်ႉဝႃႈ "ၼၢင်းယိင်းၵေႃႉၼႆႉ ႁဵတ်းႁိုဝ်ၵေႃႈ မၼ်းၵူၺ်းၸၢမ်းတူၺ်းၵဝ်ၵူၺ်း။ တေဝႃႈၵဝ်လၵ်းလႅမ်ဢမ်ႇလၵ်းလႅမ်ၼႆၵူၺ်း” ၼႆသေ ပႅၵ်ႉဝႃႈ လႆႈငိၼ်းယူႇၵေႃႈ ႁဵတ်းႁၢင်ႈၼင်ႇ ဢမ်ႇလႆႈငိၼ်းသေ ဢမ်ႇဝၢႆႇတူၺ်း၊ ဢမ်ႇဝႆႉၼၵ်းသင်၊ ၵူၺ်းၵုမ်ႇလၢတ်ႈတေႃႇ ၽွင်းမိူင်းလူင် ပရေႃးႁိတ်ႉဝႃႈ "ၽွင်းမိူင်းဢိူၺ်း ႁၢင်ႈႁေႃဢၼ်ၼႆႉ ပႄႉမႃးႁၢင်ႈလီ၊ ပဵၼ်ၽူႈလႂ်ႁဵတ်းဝႆႉ ပႄႉၶႅမ်ႉပဵၼ်တၢၼ်ႇၼႆႉ” ၼႆ။ ၵူၺ်းဢဝ်ၶေႃႈၵႂၢမ်း ဢၼ်ၼိုင်ႈယဝ်ႉ ဢၼ်ၼိုင်ႈ ယွင်ႈယေႃးႁၢင်ႈႁေႃယူႇယဝ်ႉ။ ၵူၼ်းပွင်ၵၢၼ်ၵေႃႈ ၵိူဝ်းထၢင်ႇဝႃႈ ၸဝ်ႈၶုၼ်လူင် ဢမ်ႇလႆႈငိၼ်းၼႆလႄႈ ၵမ်းၵမ်းတၢင်ႇလဝ်ႈယူႇၵေႃႈ ဢမ်ႇတိူဝ်ႉၼိူဝ်ႉသင်။ မၼ်းၸင်ႇလၢမ်းႁူႉဝႃႈ ၵႂၢမ်းသင်ႇၼၼ်ႉ ၸဝ်ႈၶုၼ်ဢမ်ႇၶဝ်ႈၸႂ်လႄႈ ၸင်ႇၶိုၼ်းၵႂႃႇၸူး ၼၢင်းသႅင်သေ တၢင်ႇလဝ်ႈဝႃႈ "ၸဝ်ႈၼၢင်းတီႈၶႃႈ ၵဝ်ၶႃႈၵမ်းၵမ်းတၢင်ႇလဝ်ႈထိုင် တီႈၸဝ်ႈၶုၼ်ယူႇၵေႃႈ ၵူၺ်းၵုမ်ႇလၢတ်ႈၵႂၢမ်း ယွင်ႈယေႃးတၢင်းႁၢင်ႈလီႁေႃယူႇဢေႃႈ။ ၶေႃႈၵႂၢမ်းၸဝ်ႈၼၢင်းႁဝ်းၶႃႈၼၼ်ႉ တေႃႈမၼ်းယင်း ဢမ်ႇမၢတ်ႈတၢၼ်ႇ ယိူဝ်ႈယႃႈၵွၼ်ႇၶႃႈ” ၼႆယဝ်ႉ။

ပေႃးဝႃႈ ၼၢင်းသႅင်သီႇဝလိ လႆႈငိၼ်းၶေႃႈၵႂၢမ်းဢၼ်ၼၼ်ႉယဝ်ႉၵေႃႈ ႁူႉဝႃႈ "ၶုၼ်ၵေႃႉၼႆႉ ပဵၼ်ၽူႈၸၢႆးမီးပၢႆးဝူၼ်ႉၶႅမ်ႉၵေႃႉၼိုင်ႈယဝ်ႉ" ၼႆ။ ၵွပ်ႈၶႆႈၸွပ်ႇတူၺ်းထႅင်ႈ ၸင်ႇသမ်ႉၸႂ်ႉၵႂႃႇႁွင်ႉ တႃႇတေမႃးၼၼ်ႉယဝ်ႉ။

ဢဝ်လၢႆးၸိူင်ႉၼႆသေ ၸႂ်ႉတေႃႇပေႃးထိုင်သၢမ်ပွၵ်ႈၵေႃႈ ဢမ်ႇမႃးလႄႈ ႁူႉဝႃႈၶုၼ်ၵေႃႉၼႆႉ ပဵၼ်ၽူႈၸၢႆးမီးၽုင်းယႂ်ႇတႄႉတႄႉၼႆ။ ပေႃးၼေႃႇၶမ်းၸဝ်ႈမႁႃႇၸၼၵ လၢတ်ႈတေႃႇၵၼ် တင်းပရိသၢတ်ႈ ၽွင်းမိူင်းၶဝ် ႁၢမ်ႉႁိုင်မႃးၼမႆ ၵွပ်ႈဢိမ်ႇၶၢၼ်ႉမႃးယဝ်ႉလႄႈ ၸင်ႇလုၵ်ႉၽၢတ်ႇတီႈၼင်ႈသေ မီးၸႂ်ႁတ်းႁၢၼ် ၸိုၼ်ႈပၢင်ႇသႂ်လီယဝ်ႉသေလႄႈ ၶဝ်ႈၵႂႃႇၸူး ႁွင်ႈလုၵ်းႁေႃ ၼၢင်းသႅင်သီႇဝလိယဝ်ႉ။

ယၢမ်းၼၼ် ၼၢင်းသႅင်သီႇဝလိ တိုၵ်ႉမွင်းပႂ်ႉၼေႃႇၶမ်းၸဝ်ႈတေမႃးယူႇ။ မိူဝ်ႈၵိုင်ႉၵၢင်ႉႁၼ် ၵွပ်ႈၼေႃႇၶမ်းၸဝ်ႈ ပေႃးတၢင်ႇ လိူၼ်မူၼ်းၸိုၼ်ႈသႂ်၊ မီးတၢင်းႁၢင်ႈလီၶႅမ်ႉလႅပ်ႈၵုမ်ႇထူၼ်ႈၼၼ်ႉလႄႈ သမ်ႉပေႃးလိုမ်းထိင်း ဢိၼ်ႇတရေႇၼၢင်းယိင်းၶဝ်သေ ႁိပ်ႈၼႅတ်ႈလုၵ်ႉၵႂႃႇၸူး တီႈၼႃႈၽၵ်းတူႁၢင်ႈႁေႃၽႂ်းၽႂ်းယဝ်ႉ။ ဢဝ်မိုဝ်းလဝ်းၼုမ်ႇယိုၼ်ႈပႅၼ်ၸူး တူဝ်ၵေႃႈၸၢႆႉႁိူင်ႈၵိူင်းၸူးတေႃႇ ၼေႃႇၶမ်းၸဝ်ႈသေ မဝ်းၶႂ်ႈဢိင်သႂ်ႇၵမ်းလဵဝ်ယဝ်ႈ။ ၼေႃႇၶမ်းၸဝ်ႈၵေႃႈ ယိပ်းဢဝ်မိုဝ်းၼၢင်းသႅင်သီႇဝလိသေ ၶဝ်ႈၵႂႃႇတီႈႁၢင်ႈႁေႃယဝ်ႉၵေႃႈ ၶိုၼ်ႈၼင်ႈၼိူဝ်ပလၢင်ႇဢၼ်ဢဝ်ၸွင်ႈၽိူၵ်ႇၵင်ႈမုင်းဝႆႉၼၼ်ႉယဝ်ႉ။ ၵမ်းၼၼ် ၽွင်းမိူင်းၶဝ်ၵေႃႈ ဢွၼ်ၵၼ်ႁွမ်းမိုဝ်း ၼွမ်းမုၼ်တီႈ ၸဝ်ႈၶုၼ်လူင်တင်းသဵင်းယဝ်ႉ။