ဢပုမ်ႇပွတ်းလႄႈၵႂၢမ်းၵပ်းထုၵ်ႇ/ႁဝ်းႁုၸႂ်ပိူၼ်ႈ ယႃႇပွႆႇငိူၼ်ႈၸႂ်ႁဝ်း

ၸၢႆးဢၢႆႈမူၼ်း ပဵၼ်ၵူၼ်းလဵင်ႉဝူဝ်းၽုင် - လူမ်ႇဢုင်ယံးၽူၼ် တိၼ်ၵူၼ်ပေႃးဢံႇႁႅင်ႈလႆႈသေပွၵ်ႈ၊ တီႈယူႇၵေႃႈ ယူႇဝၢၼ်ႈၼွၵ်ႈ ႁိမ်းသၢပ်ႇလႅၼ်ဝဵင်း လီယဵၵ်ႉလီယဵင်း ႁၢင်ႈၽၢင်ဢွၼ်ႇမၼ်းသံႉ ႁၢင်ႈလီ ၼုမ်ႇၼုမ်ႇပီးပီး မီးဝၼ်းၼိုင်ႈ မၼ်းၵႂႃႇဢၢပ်ႇၼံႉတီႈၼႂ်းၼွင် ဝႅၼ်ၸရွင်ၶိတ်းပူၵ်းတူၵ်းလူင်းပူၼ်ႉပိုၼ်ႉၼံႉၵႂႃႇ ထႃႇၼၼ်ႉ သံႉပေႃးလိုမ်းတူဝ်လူင်ၵႂႃႇ ၵႂႃႇ ၵႂႃႇ ဢံႇပေႃးတၼ်းႁိုင် - ၽိူဝ်ႇထိုင်ယၢမ်းမၼ်းႁုတူဝ်ၶိုၼ်းမႃး ဢႃးလူဝ်း ၽႅဝ်ထိုင်မိူင်းလႂ်ယဝ်ႉၼႆႉ။

ၼၢင်းႁၢင်ႈလီဢွၼ်ႇ သၢမ်သၢဝ် - ၼႃႈပေႃႈၶၢဝ်သွတ်ႇလွတ်ႇ သံႉမႃးၵွတ်ႇမႃးၵဵဝ်ႈမၼ်းသေလႄႈ ယုမ်ႉယုမ်ႉယၢႆႈယၢႆႈ ပီႈဢၢႆႈႁဝ်း ပီႈၶုၼ်ႁဝ်းတိုၼ်ႇယဝ်ႉၶႃႈႁႃႉ တီႈလႂ်ၵူၼ်ႉ တီႈလႂ်ၶိုၼ်ႈ ၽိုၼ်ႉဝၢႆႇမႃးတၢင်းၼႆႉၶႃႈလႄႈ ႁဝ်းၼွင်ႉတေမိပ်ႇပၼ်ဝႃႈၼႆ။

ၵဝ်ၼွၼ်းၽၼ်ယူဝ်ႉၼႆႉ လၢၵ်ႇလၢႆးဝႆႉတႄႉတႄႉဝႃႈဝႃႈ ပႄႉမႃးထူးၼေႃ - တႃၽႄႉတႃႁေႃ ဢမ်ႇပေႃးၸႅင်ႈလႄႈ ပဵၼ်ႁႃႉၼႆႉၵဝ်ဝႃႈ - ၶိုၼ်းမေးၸဵတ်ႉတႃသေတူၺ်းၵေႃႈ သံႉႁၼ်ယူႇ မုင်ႈတူၺ်းၵႂႃႇတၢင်းၵႆၵႆၼၼ်ႉ သံႉႁၼ်တူဝ်လူင် တူဝ်လၢင် ယၢဝ်းလူတ်ႈလူတ်ႈလၢတ်ႈလၢတ်ႈ - ၶႄႇၶဝ်ၵိၼ် ပီမႂ်ႇႁိုဝ်ၼေႃ ဢေႃး ႁိုဝ်တေၸႂ်ႈ မိူဝ်ႈၵႆႈ ၵဝ်ဝႅၼ်တူၵ်းၼံႉ ၵံးၼႆႉသံႉပဵၼ်ၼႆမႃးလူင်ၼႆႉ ၶႄးၶႄး ပဵၼ်မိူင်းၼၵႃး ဢၼ်ပိူၼ်ႈဝႃႈၼၼ်ႉယူဝ်း။

ၸႂ်ႈတႄႉဢိူဝ်ႈၵံးၼႆႉ တူၺ်းၵႂႃႇတၢင်းလႂ်ၵေႃႈ ပဵၼ်ၼၵႃးဢွၼ်ႇ ၼၵႃးလူင်ၵွႆးၵွႆး ႁွႆးဝႃႈၼၢင်းၼၵႃးၶဝ် - ၵႂႃႇဢဝ်မၼ်းမႃးႁဵတ်းၶုၼ်မိူင်းၶဝ်ယဝ်ႉလူင် မၼ်းၵေႃႈ ယိူၼ်ႉၸႂ်သူင် ယိူၼ်ႉၸႂ်ပျေႃႇၸွမ်းၶဝ် ဢံႇဝႆႉၼႃႈငဝ်တႃမူဝ်း ၸူဝ်းၵႂႃႇတၢင်းလႂ်ၵေႃႈၵႂႃႇ ဝႆႉၼႃႈသႃႇတႃလီ - ပျေႃႇမူၼ်ႈသိူဝ်း ၸွမ်းၼၢင်းၶဝ် ၵူႈဝၼ်း ၵူႈဝၼ်း ၶဝ်ႁဵတ်းပွႆးမင်ႇၵလႃႇလူင် ၸဵတ်းဝၼ်း ၸဵတ်းၶိုၼ်း ၵိုၼ်းၵေႃႈၵိုၼ်းၵျၵျ ၵံႈၽွင်ႈဝႅၼ်ၶုၼ်ႇတိုင်ႈၶိုၼ်ႈၾႃႉ သံႉၶိုၼ်းထင်ႇတူၵ်းမႃး ၼႂ်းၼွင် လိုပ်ႈၵၼ် လံးၵၼ် ပေႃးပဵၼ်ၵေႃႇပဵၼ်ၵွင် ၼႄတၢင်းၵတ်ႉၶဝ် မိူဝ်ႈယၢမ်းပွႆး - ၵိၼ်ၶႅၵ်ႇၸဝ်ႈၸွမ်မႂ်ႇၼႆႉယဝ်ႉ။

ဝၢႆးၼၼ်ႉ ႁိုင်မႃးတၢၼ်ႇတၢၼ်ႇ - မၼ်းၸင်ႇၶိုင်ၺၢၼ်ႇတၢင်းၵတ်ႉႁူဝ် ႞ လၢတ်ႈဝႃႈ - မိူဝ်ႈလဵဝ်ၼႆႉ ႁဝ်းလႆႈလီလႆႈပဵၼ် လႆႈၵတ်းယဵၼ်သိူဝ်းပျေႃႇ လႆႈၵျေႃႇၸွမ်း ၼၢင်းၶဝ်လႄႈ ပီႈၼွင်ႉမိူင်းၼႆႉ တင်းမူတ်းတင်းသဵင်ႈ ႁဝ်းၸူမ်းတႄႉတႄႉ ၵွႆးၵႃႈ ပေႃႈမႄႈပီႈၼွင်ႉႁဝ်း ၸိူဝ်းဢၼ်ယူႇၼႂ်းမိူင်းၵူၼ်းၼၼ်ႉ သံႉတေၶီငဝ်သဝ်းသူင်း ထၢင်ႇႁဝ်းဝႅၼ်လူင်းၼႂ်းၼွင်သေ တၢႆပႅတ်ႈၶဝ် တေၸူဝ်းၵၼ်လႄႇတဝ်လံႁႃႁဝ်းယူႇ ၵူႈဝၼ်းၵူႈဝၼ်းဢိူဝ်ႈ။

ၵွပ်ႈပိူဝ်ႈၼႆ ႁဝ်းၶိုၼ်းမိူဝ်းမွၵ်ႇမိူဝ်ႈလၢတ်ႈ မိူဝ်ႈၵၼ်ႇတေႃး ပေႃႈမႄႈသွင်ထဝ်ႈ ၵူၼ်းထဝ်ႈ ၵူၼ်းၵႄႇသေယဝ်ႉ ၸင်ႇပွၵ်ႈၶိုၼ်းမႃးလႄႈ ၼၢင်းၶဝ်႟... ယၢမ်းၼၼ် ၼၢင်းၶဝ်ၵေႃႈ ဢဝ်ၸွမ်းၵႂၢမ်းမၼ်းၸၢႆး ၶိုင်လၢႆးႁၢင်ႈၶိူင်ႈႁၢင်ႈၶူဝ်း ၸူဝ်းၵၼ် ပႃးတင်း ဢေႃႇၸႃႇတၢင်းၵိၼ်လံလိၼ်ၽုတ်းၶိုၼ်ႈမႃးၽႅဝ်မိူင်းၵူၼ်း။

ၸၢႆးဢၢႆႈမူၼ်းၸင်ႇဝႃႈ - လီယဝ်ႉ ၸူမ်းယဝ်ႉၼၢင်းၶဝ်ၸိူဝ်းၼႆႉ ဝႆႉၸႂ်လီလီ ပီႈတေလၢတ်ႈဢွၵ်ႇ မွၵ်ႇပၼ်သူဢိတ်းလူၵွၼ်ႇ ႁၵ်ႉၵၼ်တၢၼ်ႇလႂ်ၼႆႉၵေႃႈ - ႁဝ်းတိုတ်းၶၢတ်ႇပၢတ်ႇပႅတ်ႈ သၢႆတၢင်းႁၵ်ႉႁဝ်းတီႈၼႆႈတႃႉ... ၽဝၸိူဝ်ႉၸၢတ်ႈႁဝ်းဢံႇမိူၼ်ၵၼ် - တေမႃးတဵၵ်းၸၼ်ႁဵတ်းၽူဝ် ႁဵတ်းမေး ဢမ်ႇပဵၼ်လႆႈ သူၼၢင်းၵေႃႈ ပွၵ်ႈၶိုၼ်းမိူဝ်း မိူင်းသူ ႁဝ်းၵေႃႈ တေပွၵ်ႈမိူဝ်းႁိူၼ်းႁဝ်းယဝ်ႉ။

ၵံးၼၼ်ႉ ၼၢင်းၶဝ် ငဝ်မိုင်ၵိုတ်းၵၢတ်း သေလၢႆမၼ်းၸၢႆး ဢိုၼ်ၼံႉလၢႆးၵပ်ႉၵူင်ၶေႃႈ သံႉပေႃးၸဵတ်ႉၼံႉတႃႁင်းၽႂ်ႁင်းမၼ်း ဝၼ်းဢၼ်ယူႇတီႈ မိူင်းႁဝ်းၼၼ်ႉ ပီႈသံႉဢမ်ႇလၢတ်ႈၸိူဝ်ႉၼႆ - သံႉပေႃးဢမ်ႇပွႆႇငိူၼ်ႈသၢႆၵႂၢမ်း လၢမ်းၸွမ်းလွင်ႈယူႇပျေႃႇသိူဝ်းၸွမ်းႁဝ်းတႄႉတႄႉ ပႄႉမႃးၸၢင်ႈယိူၼ်ႉၵၼ်ႈၶၼ်ႇထီႇ မီးတၢင်းၵတ်ႉႁဵတ်းႁႂ်ႈႁဝ်းၼွင်ႉ ၶၢမ်ႇမႆႈမဝ်းၶီၸွမ်းၸၢႆးတႄႉၼေႃ - မိူဝ်ႈမႃး မႃးၸွမ်းသိူဝ်း မိူဝ်ႈမိူဝ်း မိူဝ်းၸွမ်းၶီယဝ်ႉ ၸၢႆးႁၢင်ႈလီႁၢင်ႈငၢမ်း ယၢမ်းလဵဝ်ပႄႉမႃး ႁဵတ်းလႆႈထၢၼ်ႇၼႆႉ -

ၸၢႆးမူၼ်းၸင်ႇဝႃႈ ဢိူဝ်ႈ - ၼွင်ႉသၢဝ်ၼႃႈၶၢဝ်ၶျေႃးလဝ်း မႃးၵဝ်းတဵၵ်းဢဝ်ႁဝ်းၵႂႃႇ - ပုၼ်ႈတႃႇပီႈတႄႉ ၵၼ်ႉယိူၼ်ႉပျေႃႇမူၼ်ႈၸူမ်းၸွမ်း - ႁူမ်ႈႁွမ်းယူႇလူၺ်ႈၵၼ် ဢၼ်ၼႆႉတႄႉ ပီႈမီးတၢင်းၵတ်ႉဢၼ်ဝႃႈ " ႁဝ်းႁုၸႂ်ပိူၼ်ႈ - ယႃႇပွႆႇငိူၼ်ႈၸႂ်ႁဝ်း" ၼႆဢိူဝ်ႈ မိူဝ်းၵွၼ်ႇလႃႈ မိူဝ်းၵွၼ်ႇလႃႈ...။