ဢပုမ်ႇပွတ်းလႄႈၵႂၢမ်းၵပ်းထုၵ်ႇ/ၶႂ်ႈၸဵဝ်း ႁႂ်ႈၵၢၼ်း ၶႂ်ႈၼၢၼ်း ႁႂ်ႈလႅၼ်ႈ

မိူဝ်ႈၵွၼ်ႇၵွၼ်ႇ - ပိူၼ်ႈဢံႇႁွၼ်ႇၽိတ်းၵၼ် ဢံႇတွၼ်ႉ ၵိၼ်ၼိူဝ်ႉၵၼ် - ယၢမ်းၼၼ် ၵႃႈပဵၼ်သိူဝ်လူင် ၸူင် ဢၢင် ယီး ယိူင်း ၸၢင်ႉ မႃႉ သၢင်ႇသီႈ မီထိူၼ်ႇ လႄႈ တူဝ်မိၼ် တူဝ်ၵၢၼ်း ၽၢၼ်း ၵႂၢင် ပၢင်တၢႆး ၸၢတ်ႇၶၢႆး မူ မႃ ၵႃလံ လၢင်းတႃႉ ၸႃႉၸဵမ်ၼူၵ်ႉဢွၼ်ႇၼူၵ်ႉလူင် ၶဝ်ဢၼ်ၵၼ် ႁဵတ်းပွႆးလူင် ၸဵတ်းဝၼ်းၸဵတ်းၶိုၼ်း ၵိုၼ်းၵေႃႈၵိုၼ်းတႄႉတႄႉ။

ပၢင်တၢႆး လႄႈ တဝ်ႇ

ၸၢင်ႉလူင်ႁဵတ်းၵေႃႉႁွင်ႉသေႃႇ ပေႃႉမွင်းမေႃး တရူင်းတရူင်း - ထွမ်ႇထွမ်ႇ႟ ယၢမ်းၽွင်းပွႆးလူင်ႁဝ်းၼႆႉ ၽႂ်ယႃႇပေၽိတ်းၵၼ် - ၽႂ်ႁၼ်ၽႂ်ၵေႃႈ ႁႂ်ႈမီးၸႂ်မဵတ်ႃႇ -ၽႂ်မီးပၺႃႇသင်ၵေႃႈ - မႃးၶေႉၶဵင်ႇၵၼ် လီလီငၢမ်းငၢမ်း - ၸၢမ်းႁႅင်းၵၼ်၊ လႅၼ်ႈၶေႉၵၼ် ဝႅၼ်ၶေႉၵၼ်၊ လံၼံႉလုၺ်းၼံႉၶေႉၵၼ် - မိၼ်တႅမ်ႇမိၼ်သုင်ၶေႉၵၼ် ၶႅမ်ႉၶႅမ်ႉ႟ တရူင်းရူင်း

ယၢံးၼၼ် ၸိူဝ်းလႅၼ်ႈၵေႃႈလႅၼ်ႈ ၸိူဝ်းဝႅၼ်ၵေႃႈဝႅၼ် ၸိူဝ်းမိၼ်ၵေႃႈမိၼ် ၶေႉၵၼ် ၵူႈသံႇၵူႈပိူင် ပၢင်တၢႆးတႄႉ လႅပ်ႈတေဢံႇပႄႉပိူၼ်ႈၸိူဝ်းတူဝ်ယႂ်ႇ တူဝ်လူင်ၼၼ်ႉ မၼ်းၸင်ႇ ၵႂႃႇႁၼ်တဝ်ႇ မၼ်းဝႃႈ "ႁႃးလႅၼ်ႈၶေႉၵၼ်ႁိုဝ်း လုင်းတဝ်ႇ?"

တဝ်ႇၵေႃႈဝႃႈ "ဢိူဝ်ႈ ၶေႉၸၢမ်းတူၺ်းလႄႈ ထုင်းၵႂၢမ်းမိူဝ်ႈၵွၼ်ႇဝႃႈ ၶႂ်ႈၸဵတ်းႁႂ်ႈၵၢၼ်း ၶႂ်ႈၼၢၼ်းႁႂ်ႈလႅၼ်ၼႆ ဢံႇၸႂ်ႈႁိုဝ် - ၶေႉၵၼ်ၵေႃႈ မႂ်းသုမ်းႁႃးဢိူဝ်ႈ" ပၢင်တႆး ၶႂ်ႈၶူဝ်ၼႃႇၼႃႇ -

"ပုၼ်ႈတႃႇတေသုမ်းၼႆႉ ဢံႇထၢင်ႇလႃးလႃး ပေႃးႁႃးလႅၼ်ႈၶေႉၵၼ်တႄႉ - ၵဝ်ယင်းတႃႉ ၼွၼ်းဝၼ်း သွင်သၢမ်တိုၼ်ႇ ၸင်ႇၶေႉၵေႃႈ ပႄႉဢိူဝ်ႈ မႃးလႄႈမႃးလႄႈ ၶေႉမိူဝ်ႈလဵဝ်"

ၼိုင်ႈ-သွင်-သၢမ် ယၢမ်းၼၼ် ၶဝ်လႅၼ်ႈၶေႉၵၼ် တၢင်းဝႆး ပၢင်တၢႆးသံႉပေႃးၶၼ်သေလူမ်းယဝ်ႉ - မၼ်းဢႅၼ်ႇၵႂႃႇ ၸူဝ်ႈယႃႇပလူင် ႞ ဝၢႆႇတူၺ်းမႃးတၢင်းလင် - တေႃႈယင်းပႆႇႁၼ်တဝ်ႇ၊ ၽဝ်ႇၼၼ်ႉ သံႉဢႅၼ်ႇၵႂႃႇထႅင်ႈ သၢမ်ႁူၺ်ႈ သၢမ်ၵုင်ၵုင်း ႁွင်ႉဝႃႈ - ႁိူဝ်း လုင်းတဝ်ႇ - မႂ်းမီးယူႇတီႈလႂ် - ၼႆၵေႃႈ ဢံႇငိၼ်းသဵင်ၽႂ် တွပ်ႇၶိုၼ်းမႃး မၼ်းၵေႃႈဝႃႈ တႃႉၵဝ်ၼွၼ်းဝၼ်းပႂ်ႉမၼ်း သွင်သၢမ်တိုၼ်ႇၵေႃႈ ပႄႉလီလီယူႇ ၼႆလႄႈ ၼွၼ်းလပ်းဝႆႉယဝ်ႉ။

တဝ်ႇတႄႉ ဢံႇၵိုတ်းဢံႇလိုဝ်ႈ - ၵႂႃႇသိုဝ်ႈသိုဝ်ႈ ဢံႇဝၢႆႇတူၺ်းၽႂ် ယၢင်ႈ ႞ ယဝ်ႉ ယၢင်ႈ ႞ ဝႃး ႞ ယဝ်ႉ ဝႃး ႞ ၶပ်ႉၶၢဝ်းၵႂႃႇလွႆးလွႆး တေႃႇပေႃးၽႅဝ်ပွႆး တီႈပၢင်ႇၶေႉၶဵင်ႇၵၼ်ၼၼ်ႉယဝ်ႉ၊ ပၢင်တၢႆးတႄႉ ပိူဝ်ႈမၼ်းလႅၼ်ႈၶိုၼ်ႈႁူၺ်ႈလူင်းၵွင်း ယၢမ်းၽွင်းၼွၼ်းၼၼ်ႉ လပ်းလီၼႃႇၼႃႇ တေႃႇထိုင် ဝၼ်းၸၢႆႉလူင်း ၸင်ႇၽုတ်ႇၽၢတ်ႇလုၵ်ႉမႃးတူၺ်း ၽၢႆႇၼႃႈၽၢႆႇလင် တႃသံႉၵႂင်ယဝ်ႉလႄႈ - လႅၼ်ႈၶုၼ်ႇၶိုၼ်းတင်းၵဝ်ႇ - ၵႂႃႇထိုင်တီႈမၼ်း ႁူပ်ႉတဝ်ႇ မိူဝ်ႈၸဝ်ႉၼၼ်ႉသေယဝ်ႉ သံႉၶုၼ်ႇၶိုၼ်းမႃး - ဢႅၼ်ႇဝႆးဢႃးလႃး ပႃးလႃး ၽိူဝ်ႇမၼ်းထိုင်မႃးၼႂ်းပွႆး သံႉပေႃး တူၵ်းလိုၼ်းတဝ်ႇဝႆႉယဝ်ႉ။

ယၢမ်းၼၼ် တဝ်ႇၵေႃႈ ယုမ်ႉသၢႆႉဝၢႆႈလႅင်ႈ - မိုဝ်းတဝ်ႉဢႅင်ႈတိၼ်ယၼ်ၶႃၵၢင်ႇသေယဝ်ႉ လၢတ်ႈဝႃႈ ပီႈသၢင်ႇပၢင်တၢႆးၶဝ် - ပဵၼ်ႁိုဝ်ဢေးၵံးၼႆႉ ႁဝ်းတႄႉ လိုဝ်ႈႁိူဝ်ႉႁိူဝ်ပေႃးယဵၼ်ထင်တီႈ - ၶီႈႁဝ်းသံႉပေႃးၵတ်းယဝ်ႉ တၢင်းၶတ်းၸႂ် ႁႂ်ႈမိူၼ်တဝ်ႇဢၼ်ဝႃႈၼၼ်ႉ ႁုႁိုဝ်ႉၵံးၼႆႉ၊ ၼႂ်းလေႃးၵလူင်ၼႆႉ ၽူႈဢံႇသုတ်ႈဢံႇႁူၼ် တေႁူင်ႁၢင်း - ၽူႈဢံႇသႂၢင်းၵိၼ်ပိူၼ်ႈတေတူၵ်းတႅမ်ႇဢိူဝ်ႈ ဢၢႆႈႁူတင်ႈႁူတွပ်း႟။

←  လမ်းၼႂ်း