ဢပုမ်ႇပွတ်းလႄႈၵႂၢမ်းၵပ်းထုၵ်ႇ/သူပ်းလီၵႂၢမ်းငၢမ်း ထိုင်ယၢမ်းၸင်ႇလၢတ်ႈ

"ႁၵ်ႉဢံႇၸၢၼ်ႈ ဢၢၼ်းဢိမ်ႇ သေပွၵ်ႈလႃးလႃး"

"ႁၵ်ႉတေႃႁၵ်ႉ မိူၼ်ပီႈတင်းၼွင်ႉ သွင်ႁႃး"

"ပႃးႁု တေၵႃႈတွႆး ၵွင်ႉမိုဝ်းဢွၼ်ႇ ပႆယၢင်ႈၸွမ်းၵၼ်ယဝ်ႉ"

ၼႆႉ ပဵၼ်သဵင်ၵႂၢမ်း ၼၢင်းၵိင်ႇၼရီႇ လႄႈ ပီႈၶုၼ်ၵိင်ႇၼရႃႇၶဝ် သွင်တူဝ်ၽူဝ်မေး ထေႃယေးႁွင်ႉၵႂၢမ်းၸွမ်းၵၼ်သေလႄႈ ၵႃႈပၼ်ႇ လဵပ်ႈႁိမ်းၼွင်ၼႂ်းထိူၼ်ႇလူင်တီႈ ႞ ၼၼ်ႉယဝ်ႉ - ပူႇလႃႈၼိူဝ်ႉမူးသိူဝ်းၵေႃႉ ႞ မႃးႁၼ်သေယဝ်ႉ ပႂ်ႉလွမ်တူၺ်း ... ဢူၺ်း... ဢူၺ်း... တူဝ်သင်ၼႆႉဢေး ပႄႉမႃးမေႃၵႃႈ ႁၢင်ႈလီၼႃႇၼႃႇ မေႃႁွင်ႉၵႂၢမ်း သဵင်ဝၢၼ်ပေႃးတၢၼ်ႇၼႆႉ ပႆႇတွၼ်ႉႁၼ် တွၼ်ႉငိၼ်းသေပွၵ်ႈ -

ၽိူဝ်ၵဝ်ႇၵႂႃႇႁႃ ယိုဝ်းၽၢၼ်းယိုဝ်းၵႂၢင် - တႃႉၵဝ်ၵၢင်ဢဝ်သွင်တူဝ်ၽူဝ်မေးၼႆႉ - မိူဝ်းသၢၵ်ႈၸဝ်ႈၸွမ် ၶုၼ်မိူင်း တႃႉယင်းတေလႆႈငိုၼ်းသူး - လၢႆမိုၼ်ႇ လၢႆႁဵင်ၵွၼ်ႇဢိူဝ်ႈ - ဝူၼ်ႉလႆႈၼင်ႇၼႆသေ ပွင်ၶိုင်သၢႆႁႅဝ်ႉတူင်ႇၶိုမ်း ၵိုမ်းၵိုမ်းမႃးၵၢင်ဝႆႉ ႁိမ်းၼွင် တီႈသွင်ၶႃ ၵႆႉလူင်းမႃးၼၼ်ႉ။ ထိုင်မိူဝ်ႈၽုၵ်ႈၵၢင်ၼႂ် မိူင်းသႂ်လႅင်းမႃး ရထႃးဝူင်းဝၼ်း ပႆႇတၼ်းႁိူဝ်ႈႁိူင်း ပိူင်းဢွၵ်ႇၼိူဝ်ပၢႆလွႆၼၼ်ႉ သွင်ၶႃၽူဝ်မေးၵေႃႈ မူၼ်ႈမူၼ်ႈသိူဝ်းသိူဝ်း မိၼ်လူင်မႃး ထၢင်ႇဢံႇမီးရၢၼ်ႇမီးၽေး ထေႃယေးႁွင်ႉၵႂၢမ်း ၵူပ်းၵၼ် တိၼ်ယၼ်ယဵပ်ႇယၢင်ႈ ၸင်ႇထုၵ်ႇၺႃးၶိုမ်းႁတ်ႉၵိုမ်း ၼႅၼ်ႇၼႅၼ်ႇ - သႅၼ်ႇႁွင်ႉပွင်ႉၶၢင်းယူႇ တင်းၽူဝ်တင်းမေးယဝ်ႉ။

မူးသိူဝ်းၵေႃႈ ၵိူဝ်းလႆႈသူးလၢပ်ႈ ၸင်ႇဢဝ်မိူဝ်းၼွပ်ႇဢၢပ်ႈသၢၵ်ႈပၼ် ၸဝ်ႈၸွမ် - လၢတ်ႈဝႃႈ တူဝ်သင်ၵေႃႈဢံႇႁု ၼႃႈတႃသံႉမိူၼ်ၵူၼ်း တိၼ်မိုဝ်းသံႉမိူၼ်ၼူၵ်ႉ - မေႃၵႃႈမေႃႁွင်ႉၵၢမ်း သဵင်လီၼႃႇၼႃႇၼႆလႄႈ - ၵံးၼၼ်ႉ ၶုၼ်မိူင်းၸႂ်ႉၵႃႈၼႄ ၸႂ်ႉႁွင်ႉၵႂၢမ်းၼႄ၊ ဝၼ်းလႂ်ဝၼ်းလႂ်ၵေႃႈဢံႇႁွင်ႉ ဢံႇၵႃႈ ၵူမ်ႈၼႃႈၶူတ်းယူႇၼင်ႇၼၼ် -

ထိုင်မႃးလၢႆဝၼ်းယဝ်ႉ ၽဝ်ႇၼၼ်ႉ ၶုၼ်လူင် ၸင်ႇပူင်ၵႂၢမ်းဝႃႈ သွင်တူဝ်ၽူဝ်မေးၼႆႉ ၸႂ်ႉႁွင်ႉၵၢမ်းၵေႃႈဢံႇမေႃႁွင်ႉ ၸႂ်ႉၵႃႈၵေႃႈဢံႇမေႃၵႃႈ - မိူဝ်ႈၼႆႉ လူဝ်ႇၶႃႈၸႂ်ၶဝ် ဢဝ်ႁဵတ်းၽၵ်းၵိၼ်ပႅတ်ႈတႃႉ ယင်းတေဝၢၼ်ဢိူဝ်ႈ။

ၸၢႆးၵိင်ႇၼရႃႇ ၸင်ႇတၢင်ႇလဝ်ႈဝႃႈ "ၸဝ်ႈတူၼ်ပဵၼ်ၸဝ်ႈႁဝ်းၼေႃႈ ယွၼ်းၶႂၢင်းတၢင်းၽိတ်း ယႃႇပေၶႃႈဢသၢၵ်ႈႁႃးၽူဝ်မေးသေၵံးတီႈၶႃႈၼေႃး"

ၶုၼ်လူင်ၵေႃႈဝႃႈ " ဢေႃး... ၵူႈဝၼ်းၵူႈဝၼ်း မႂ်းသံႉဢံသဵင်ဝႆႉ၊ မိူဝ်ႈၼႆႉသံႉ မေႃလၢတ်ႈ ၵႂၢမ်းၵူၼ်းမႃးၼေႃ - ပေႃးပဵၼ်ၼႆႉ တူဝ်ပေႃႈၼႆႉဝႆႉလႄႈ - ဢဝ်တူဝ်မႄႈၵႂႃႇၶႃႈယေႈၶႅၼ်းတေဝၢၼ်ႈယူဝ်ႉ။"

"ၼေႃးတီႈၶႃႈ ၸဝ်ႈတူၼ်ပဵၼ်ၸဝ်ႈတၢင်ႇၸွမ်ၵဝ်ႈႁဝ်းၼေႃႈ - ၶႅၼ်းတေႃႈဝႆႉၸႂ် မဵတ်ႉတႃႇဢိတ်းဢူ - ဢႃႇယုဢသၢၵ်ႈႁႃး ၽူဝ်မေး ႁႂ်ႈလႆႈလွတ်ႈ ၽေးတၢႆသေၵံးၼေႃႈ..."

ႁႂ်ႉ... ၵူႈဝၼ်းၵူႈဝၼ်း မႂ်းသံႉဢံႇလၢတ်ႈ မိူဝ်ႈၼႆႉၵေႃႈ ယူႇတဵတ်ႇတဵတ်ႇလႄႈ ၽၵ်းႁဝ်း လိူဝ်မႃးထႅင်ႈ မီႇ ႞ ဢိူဝ်ႈ"

"ၼေႃးတီႈၶႃႈ ၸွမ်းၼင်ႇ ၵႂၢမ်းၵပ်းထုၵ်ႇဝႃႈဝႆႉ သူပ်းလီၵႂၢမ်းငၢမ်း ထိုင်ယၢမ်းၸင်ႇလၢတ်ႈ" ၼႆလႄႈ မိူဝ်ႈၼႆႉ ထိုင်ယၢမ်းလၢတ်ႈၵႂၢမ်းယဝ်ႉ ၊ တီႈၶႃႈၼေႃႈ"

"ပေႃးၼႆၸႂ်ႉၵႃႈၸႂ်ႉႁွင်ႉၵႂၢမ်းၵေႃႈ ဢံႇၵႃႈ ဢံႇႁွင်ႉ သွင်ၶိူဝ်လိူဝ်ပႅၼ် ၵႂၢမ်းၸဝ်ႈ ၵႂၢမ်းၶုၼ်ယဝ်ႉ ဢံႇၸႂ်ႈႁိုဝ်၊ သွင်ၶိူဝ်ဢံႇသႂၢင်းၵိၼ် ႁဝ်းလူင်"

"ၼေႃးတီႈၶႃႈ ဢံႇၼပ်ႉဢံႇသႂၢင်းၶုၼ်ၼၢင်းၸဝ်ႈၸွမ်ႁဝ်းၶဝ်တႄႉ ဢမ်ႇၸႂ်ႈၼေႃႈ.. ပေႃးႁႃးၵႃႈ ႁႃးႁွင်ႉၵၢမ်းၼႄ ၵူႈဝၼ်းၵူႈဝၼ်းၸိုင် - ၵေႃႉဝႃႈလီတေပႃး ၊ ၵေႃႈဝႃႈၸႃႉတေမီး ဢံႇလွတ်ႈတၢင်းၽိတ်းလႄႈ ၸင်ႇဢံႇၵႃႈ ဢံႇႁွင်ႉ ဢံႇလၢတ်ႈၵႂၢမ်းတီႈၶႃႈ - ၵွပ်ႈပိူဝ်ႈဝႃႈ မိူဝ်ႈၼႆႉ ထိုင်ယၢမ်းမၼ်းယဝ်ႉ ၸင်ႇတၢင်ႇလဝ်ႈၸဝ်ႈၸွမ်ႁဝ်းဢေႃႈ။"

"ဢိူဝ်ႈ... ပေႃးပဵၼ်ၼႆႉ ၸႂ်ႈဢိူဝ်ႈၸႂ်ႈဢိူဝ်ႈ ဢဝ်ၶိုၼ်းၵႂႃႇပွႆႇပၼ် တီႈယူႇၵဝ်ႇၶဝ်ၼၼ်ႉသေလီယဝ်ႉ။"