ဢပုမ်ႇပွတ်းလႄႈၵႂၢမ်းၵပ်းထုၵ်ႇ/လဵၼ်ႈၵႂၢမ်းယွႆႈဢံႇလႆႈ မႆႈပိူၼ်ႈၸၢင်ႈၸပ်းႁဝ်း

သၢင်ႇယုင်ႈ လႄႈ ၼၢင်းယူင်ႇ ၸဵမ်မိူဝ်ႈလၵ်ႉၵၼ်ဢွၵ်ႇပၢႆႈၵႂႃႇ ပုၼ်ႈတႃႇပေႃႈမႄႈ တင်းသွင်ၽၢႆတႄႉ တိုၼ်းဝႃႈ ဢံႇဢၢၼ်းႁွင်ႉ ဢၢၼ်းႁႃ ၵွပ်ႈပိူဝ်ႈသၢင်ႇယုင်ႈၼႆႉ မီးမေး ဢေးယူင်ႇၼႆႉၵေႃႈ ပိူၼ်ႈပေႃးမႃးမၢႆဝႆႉယဝ်ႉ၊ သွင်ၶႃႈၵေႃႈ ဝူၼ်ႉဝႃႈ တႃႉႁႃးသွင်ႉၵႂႃႇယူႇ ၵႆၵႆလီယဝ်ႉ - ၼႆသေ ၵႂႃႇႁဵတ်းၵိၼ်ႁႃၵိၼ်တၢင်ႇမိူင်းယဝ်ႉ။

သၢင်ႇယုင်ႈတႄႉ ၶတ်းၸႂ်သႂ်ႇႁႅင်း ႁႃငိုၼ်းၵူႈဝၼ်းဝၼ်း မေးမၼ်းတႄႉ လႄႇႁႃမိုတ်ႈပိူၼ်ႈ ႁိူၼ်းတႂ်ႈႁိူၼ်းၼိူဝ် ၵႆႉဢုပ်ႇၵႆႉလၢတ်ႈ ၵႆႉၶႆႈၶိူဝ်း ဢီႇၼၼ်ႉ ပဵၼ်ၼႆ ဢၢႆႈၼႆႉ ပဵၼ်ၼၼ် ၶိူဝ်းမိူဝ်ႈလႂ်မိူဝ်ႈၵွၼ်ႇ ၶိူဝ်းမိူဝ်ႈဢွၼ်ႇ မိူဝ်ႈလဵၵ်ႉမိူဝ်ႈလႅင် တွင်းၵိုမ်းသုတ်း။

ပေႃးထိုင်ဝၼ်းသိၼ်ဝၼ်းထံး ပီႈႁိူၼ်းႁွင်ႇ ၼွင်ႉႁိူၼ်းၸၢၼ်း မႃးၸူဝ်းၵႂႃႇဝတ်ႉၵႂႃႇၵျွင်း မၼ်းသံႉဝႃႈ ႁူဝ်မဝ်း ႁူဝ်ၶႆႈ တၢင်းတႄႉ မၼ်းဢံႇလႆႈၵႂၢမ်းဝႆႈၽြႃး ၵႂၢမ်းၶၢမ်ႇသိၼ် ယၢတ်ႇၼံႉဢွၼ်ႇၵွႆးၵေႃႈဢံႇမေႃ ဢွၵ်းဢေႃမၼ်း သံႉၵတ်ႉၽၢႆႇၶႃႉၸိုဝ်ႈၶၢႆသငေ်ပိူၼ်ႈ ဢီႇၼၼ်ႉပႅတ်ႈလၢႆ၊ ဢၢႆႈၼၼ်ႉယွၵ်းၼႃႇ ၸဵမ်မိူဝ်ႈပူၼ်ႉမႃး လၢႆပီလၢႆလိူၼ်ၼၼ်ႉ မၼ်းဝႃႈၼႆဝႃႈၼၼ်ႉၼေႈ ၸိူဝ်းၼႆႉသမ်ႉတွင်းၸႃးၵျၵျ။

ပိူၼ်ႈၸူဝ်းၵႂႃႇထွမ်ႇတြႃး သမ်ႉဢမ်ႇတွင်းမႃးသေၶေႃႈ ပိူၼ်ႈသွၼ်ၵႂၢမ်းဝႆႈၽြႃးပၼ်မၼ်းၵေႃႈ ဝႃႈၽိတ်းဝႃႈၽူၼ် ဝၸီႇၵမ်ႇ မၼေႃးၵမ်ႇ သံႉဝႃႈမႃႉလီႈၵမ်ႇမႃႉလေႃႈၵမ်ႇ ပိူၼ်ႈဝႃႈ တွႃတသဵၼ်းၸ မၼ်းသမ်ႉဝႃႈ တၢႆၸႃႉၶႅၼ်းၵျ ႁဵတ်းၼႆလူင်ၵႂႃႇ ပေႃးပဵၼ် ၽႃႇသႃႇၽၢႆႇလိၵ်ႈၽၢႆႇထံး ဢမ်ႇၸၢင်ႈတွင်းလႃးလႃး ပႃႇလိၵႂၢမ်းၽြႃးယႃႇၽူမ်ႈဝႃႈသုတ်းတီႈ - "ဝႆႈၵုင်ႈၸဝ်ႈသၢမ်ပႃး" ယင်းဝႃႈ ဝႆႉၵုၼ်ႇၸဝ်ႈသၢမ်ပျႃးၼႆလူၵွၼ်ႇ...

ယူႇႁိုင်ထိုင်ၼၢၼ်းမႃး ဢႃႇယုဢသၢၵ်ႈၵႄႇၵိူင်ႈၵၢင်ၵူၼ်းယဝ်ႉ ၸိူဝ်းႁွင်ႉၼႃႉၵေႃႈပႃး ၸိူဝ်းမႃးႁွင်ႉပႃႈၵေႃႈမီး ထိုင်ၶၢဝ်းပီမႂ်ႇ လႄႈ ဢွၵ်ႇဝႃႇ လုၵ်ႈလၢၼ်ပႃးဢေႃႇၸႃႇမႃးၵၼ်တေႃးၵေႃႈ ဢမ်ႇမေႃႁေႃး - တေႃႉတႄႉဝႃႈ ဢိူဝ်ႈ ႁႂ်ႈယူႇလီၵိၼ်ဝၢၼ်ႈၵူႈၵေႃႉ ယႃႇပေၽိတ်းၵၼ်ၼႃႈ ပေႃးယဝ်ႉ ပေႃးယဝ်ႉ ၶွင်လီဢံႇတၢပ်ႈၼံ ႁီး ႁီး ႁီး ၼႆ။

ႁိုင်မႃးလွႆးလွႆး ၵႂႃႇပွႆးၽြႃး ၵႂႃႇၶႅၵ်ႇလီပၢင်ၸႃႉၵေႃႈ ဢံႇပေႃးႁတ်းၼေၼႃႈၼႄတႃ ႁႃၼင်ႈတီႈၸွၵ်ႉတီႈၸဵင်ႇ ထိုင်ၶိင်ႇၼႂ်းဝႃႇၵေႃႈ ဢံႇၵႆႉႁွတ်ႈၵယွင်း ၵွပ်ႈဢံႇမေႃသူးတွင်းဝႆႈၽြႃး ၶၢမ်ႇသိၼ်ယၢတ်ႇၼံႉသမ်ႉလီဢၢႆတူဝ်ၵဝ်ႇ ၵွပ်ႈမၼ်းၽိုၵ်းထဝ်ႈ မႃးလွႆးလွႆး မိူဝ်ႈလႂ်ၵေႃႈ ၵွႆးႁုလႄႇႁိူၼ်းတႂ်ႈႁိူၼ်းၼိူဝ် မိူဝ်းႁိူၼ်းတူၵ်းႁိူၼ်းဢွၵ်ႇ ၵႂႃႇပွၵ်ႉႁွင်ႇပွၵ်ႉၸၢၼ်း ၸိူဝ်းပိူၼ်ႈႁဵတ်းဢံႇမထၢၼ်း ၽႃႇဝၼႃႇတႃႇၼသီႇလၼၼ်ႉတႄႉ မၼ်းဢမ်ႇမေႃၶႃႉဢမ်ႇမေႃလၢတ်ႈၸွမ်း ၸိူဝ်းပိူၼ်ႈႁဵတ်းၵၢၼ်ယွၵ်းၵၢၼ်သွမ်း ဢၵုသူလ်ႇ ၵူတ်ႉၽူဝ်ႁိမ်မေးလဵၼ်ႈၸု ၽိတ်းၸူဝ်းၵၼ်ၼၼ်ႉ မၼ်းတွင်းဝႆႉသဵင်ႈသဵင်ႈ သိုပ်ႇဢဝ်ၵႂၢမ်းလႃႇဢေးဢဵင်ႈ ၵႂႃႇလၢတ်ႈၼႄ ဢေးဢီႇ - တေႃႉဢဝ်ၵႂၢမ်းပွင်ႉဢေးဢီႇ ၵႂႃႇၶႆႈၼႄ ဢေးဢၢမ် ပႃးဢဝ်ၵႂၢမ်းၼႄးဢေးဢၢမ် ၵႂႃႇၸုတ်ႇၵူၼ်ႈဢေးလူင်ႇ တေႃႉသူင်ႇၶႃႉၶၢႆၵႂၢမ်းပႅတ်ႈလၢႆ ပႅတ်ႈလွၵ်ႇၸွၵ်ႉသႂ်ႇတီႈၸံ တံၺႃးတီႈၵႆႁဵတ်းၼႆ ပေႃးတၢၼ်ႇ မၼ်းပဵၼ် ၼၢႆးၵၢၼ်ႇထရႅၵ်ႈ - ၵႂၢမ်းယွႆႈယဝ်ႉ။

ထိုင်မႃးပွၵ်ႈ ႞ ပူႇၵႄႇထႃႉထိႁင်းၼၢႆးၵႄႇ မၼ်းသံႉလႄႇဢဝ်ၶႆႈပိူၼ်ႈ ၸွတ်ႇမၢၼ်ႈ ၵႂၢမ်းသၢၼ်ႈ ႁွတ်ႈၶိုၼ်းၽႅဝ်ႁူပူႇၵႄႇ ပူႇၵႄႇၸင်ႇႁွင်ႉဢဝ်ၶဝ်ၽူဝ်မေးမႃးဝႃႈ လုၵ်းသၢင်ႈယုင်ႈ လႄႈ ၼၢႆးလွႆယူင်ႇ႟ ၼႂ်းတူင်ႇႁဝ်းမိူဝ်ႈလဵဝ်ၼႆႉ ၵႆႉၵႆႉငိၼ်းဝႃႈ ဢၼ်ပိူၼ်ႈၽူဝ်ႈမေးၽိတ်းၵၼ်ၵေႃႉသေႈၵၼ် ၸင်းၵၼ် ၸုၸူဝ်းၵၼ် ၽိတ်းၵၼ်ႁိူၼ်းႁွင်ႇႁိူၼ်းၸၢၼ်း ထဵင်ၵၼ် ပွၵ်ႉတူၵ်းပွၵ်းဢွၵ်ႇ လႃႇၵၼ်ၼႆႉ ၵွပ်ႈၼၢႆးလွႆယူင်ႇ လွၼ်ႉလွၼ်ႉယဝ်ႉ ၵဝ်ထႃႉၼၢႆးၵႄႇ ဝူင်ႈပူၼ်ႉၼႆႉ မၼ်းပေႃးတေႃႉ ၶႆႈၸွတ်ႇမၢၼ်ႈယဝ်ႉ မိူဝ်ႈၼႆႉ ၵဝ်တေပၼ်တၢမ်ႇမၼ်း -

မၢႆၼိုင်ႈ - ပၼ်ၸိုဝ်ႈ ၼၢႆးၵၢၼ်ႇထရႅၵ်ႉၵႂၢမ်းယွႆႈ တႅမ်ႈလိၵ်ႈႁွႆႈၶေႃႈမၼ်းဝႆႉတႃႇသေႇ

မၢႆသွင် - တူၵ်းထွင်ႇ လိူၼ် ႞

မၢႆသၢမ် - ထႃႁူဝ်ႁဵတ်းၼၢႆးၶၢဝ်

မၢႆသီႇ - တႄႇဢဝ်မိူဝ်ႈၼႆႉတေႃႇတၢႆ တေဢံႇလႆႈၶႃႉၶၢႆသႄႉသွမ်း လၢတ်ႈၶိူဝ်းပိူၼ်ႈ ပေႃးငိၼ်းမႃး ပၢတ်ႇလိၼ်ႉထိူဝ်သူပ်း

ၼႂ်းသီႇပိူင်ၼႆႉ - လိူၵ်ႈဢဝ်လႄႈ တေဢဝ်ဢၼ်လႂ်

ၼၢႆးယူင်ႇၸင်ႇဝႃႈ ဢေႃႈ... ၸိုဝ်ႈမႂ်ႇၵေႃႈဢံႇၶႂ်ႈလႆႈ ထွင်ၵေႃႈဢံႇၶႆႈတူၵ်း ထႃႁူဝ်လွမ်ႈၵူၵ်းလူၵ်းၵေႃႈ ဢံႇၽွမ်ႉ ပၼ်ၵတိဢဝ်မၢႆသီႇ ၶႃႈတေလၢပ်ႇတေႃႇတၢႆ ၵႂၢမ်းပႅတ်ႈလၢႆဢံႇလၢတ်ႈထႅင်ႈယဝ်ႉ - လုင်းၵႄႇ႟။

လုင်းသၢင်ႇယုင်ႈၸင်ႇဝႃႈ ၵဝ်ႇလၢတ်ႈယူႇ တႃႇသေႇ သူဢံႇထွမ်ႇၵႂၢမ်းၵဝ်လူင်...

"လဵၼ်ႈၵႂၢမ်းယွႆႈဢံႇလႆႈ - မႆႈပိူၼ်ႈၸၢင်ႈၸပ်းႁဝ်း" ၼႆဢံႇၸႂ်ႁိုဝ်။