ပပ်ႉၵႅမ်မိုဝ်းယေႃးၵီႇ/မိူင်ႈၽွင်းလႆႈမႃး သွင်သၢမ်ဝၼ်း

ယေႃးၵီႇ ဢၼ်ႁဵတ်းၵၢၼ်တြႃးၼၼ်ႉ ပေႃးဝႃႈ လႆႈမႃး သွင်သၢမ်ဝၼ်းၼႆ တိုၵ်ႉပဵၼ် ၽွင်းယူႇယၢပ်ႇၶၢၼ်ၸႂ်ယဝ်ႈ။ ထၢတ်ႈၸႂ်ၵေႃႈ ၸၢင်ႈတူၵ်း။ တေဢွၵ်ႇၸႂ်ၶႂ်ႈမိူဝ်း၊ တေဢွၵ်ႇၸႂ်ၵူဝ်တြႃးသေ တေမီးၸႂ် ၶႂ်ႈလႄႉလၢႆးၼိုင်ႈယဝ်ႉ လၢႆးသွင်သေ ႁႃတၢင်းမိူဝ်းယူႇ။ ၵူၺ်းၵႃႈ တေသိုပ်ႇဝႆႉၸႂ်ဝႃႈ "ငႃးၸၢင်ႉဢၼ်ပႅၼ်ဢွၵ်ႇမႃးၼၼ်ႉ ဢမ်ႇတွၼ်ႉၶိုၼ်းႁူတ်းၶဝ်ႈ" ၼႆသေ တေလႆႈသိုပ်ႇၶတ်းၸႂ်ၵၢၼ်တြႃးၵႂႃႇယူႇ။ ပေႃးပူၼ်ႉၼၼ်ႉသေ လႆႈမႃးသီႇႁႃႈဝၼ်းမႃးၼႆတႄႉ လွင်ႈၼင်ႈၵေႃႈမေႃမႃး၊ လွင်ႈယၵ်ႉၵေႃႈႁူႉမႃး၊ လၢႆးဝႆႉဝၢင်းၵေႃႈ ႁၼ်ၽၢႆႇမၼ်းမႃးယဝ်ႉလႄႈ ထၢတ်ႈၸႂ် တေၶိုၼ်းမီးၸႂ် ၶႂ်ႈလႆႈတြႃးတႃႇတေဢွၵ်ႇမူၼ်ႉပူၼ်ႉလွတ်ႈၼၼ်ႉယူႇ။ ၵွပ်ႈၼႆ ယေႃးၵီႇ ဢၼ်ဝႃႈၼၼ်ႉ တေလႆႈမီးၼမ်ႉၸႂ်ၵႅၼ်ႇၶႅင်ယဝ်ႈ။ ယေႃးၵီႇဢၼ်ဝႃႈၼႆႉ လွင်ႈမၢႆတွင်းတြႃး လွင်ႈဢဝ်တြႃးသႂ်ႇၸႂ်ၼၼ်ႉ တေလႆႈမီးသတိတြႃးၵူႈၶိင်ႇၵူႈၶၢဝ်းသေ ဢဝ်တြႃးသႂ်ႇၸႂ်ၵူႈၶိင်ႇၵူႈၶၢဝ်းယူႇ။ ယႃႇပေၵယူႇလွၵ်ႇယူႇလၢႆ။ ပေႃးမီးၶၢဝ်းယၢမ်းၼႆၼင်ႈၵေႃႈယဝ်ႉ ၸုၵ်းၵေႃႈယဝ်ႉ၊ ပႆၵေႃႈယဝ်ႉ ႁဵတ်းသင်ၵေႃႈယဝ်ႉ ယႃႇပေဢဝ်ၸႂ် ၽၢတ်ႇတူဝ်ၸဝ်ႈၵဝ်ႇ၊ သင်ဢမ်ႇၸၢင်ႈတူၺ်းၼႆၸိုင် ဢဝ်ၸႂ်ၸပ်းတီႈ လူမ်းၶဝ်ႈလူမ်းဢွၵ်ႇ ၸဝ်ႈၵဝ်ႇသေ မၢႆတွင်းသတိၸွမ်း တီႈၼၼ်ႈတႃႉ။