ပပ်ႉတူမ်ႈႁုင်:ၽၵ်းႁိၵႅင်

ပပ်ႉတူမ်ႈႁုင် | လၢႆးမိုဝ်ႉႁုင် | မီႇၵီး | ၽၵ်းၶဵဝ်

ၽၵ်းႁိၵႅင်
ပိူင်ထၢၼ်ႈ	လၢႆးမိုဝ်ႉႁုင် ဢၼ်ၵႅင်
ႁဵတ်းတႃႇ	4
တၢင်းႁိုင်	30 မိတ်ႉၼိတ်ႉ
လွင်ႈႁဵတ်းယၢပ်ႇ

ၶိူင်ႈမိုဝ်ႉႁုင်

• ၽၵ်းႁိ - ဢၼ်လိူၵ်ႈယဝ်ႉ မွၵ်ႈ 25-30 ၵျၢပ်ႈ
• ၵိူဝ် - ၵမ်ႉသၢင်ႇထုၵ်ႇ
• ၽွင်ဝၢၼ် - ၵမ်ႉသၢင်ႇထုၵ်ႇ
• ထူဝ်ႇၼဝ်ႈ - ၵမ်ႉသၢင်ႇထုၵ်ႇ
• ၼမ်ႉမၼ်း - သၢမ်သီႇယွတ်ႇ
• မၢၵ်ႇၶိူဝ်သူမ်ႈ - 2 လုၵ်ႈ
• ၽၵ်းမီႇႁူဝ်လႅင် - 4 ႁူဝ်

လၢႆးမိုဝ်ႉလၢႆးႁုင်

1. ဢွၼ်တၢင်းသုတ်း လိူၵ်ႈၽၵ်းႁိ၊ ပွၵ်ႇၽၵ်းမီႇႁူဝ်လီ သီႇႁူဝ်သေ သွႆးဝႆႉသေးသေး၊ မၢၵ်ႇၶိူဝ်သူမ်ႈၵေႃႈ သွႆးဝႆႉ
2. ဢဝ်ၼမ်ႉသႂ်ႇၼႂ်းမေႃႈသေ တင်ႈၼိူဝ်ၽႆး
3. ဢဝ်ၵိူဝ်၊ ၽွင်ဝၢၼ်၊ ၽွင်ထူဝ်ႇၼဝ်ႈ သႂ်ႇသေ ဢဝ်ၼမ်ႉမၼ်း ယွတ်ႇသႂ်ႇ မွၵ်ႈ သၢမ်သီႇယွတ်ႇသေ ၶိုဝ်ႇပၼ် ႁႂ်ႈၼမ်ႉမၼ်းၽူတ်ႉမႃး
4. ပေႃးဝႃႈ ၶိုဝ်ႇၼမ်ႉၽၵ်း မၼ်းၽူတ်ႉမႃးယဝ်ႉၼႆ ဢဝ် ၽၵ်းႁိ လႄႈ ၽၵ်းမီႇႁူဝ်လႅင် ဢၼ်သွႆးဝႆႉၼၼ်ႉ သႂ်ႇသေ ၶူၼ်းတႂ်ႈၶူၼ်းၼိူဝ်သေၵေႃႈ တင်ႈဝႆႉပၼ် ႁႂ်ႈၽၵ်းႁိမၼ်း ပူၺ်ႇမႃး
5. ပေႃးဝႃႈ ဢဝ်မိုဝ်းယိပ်းတူၺ်းဝႃႈ ၽၵ်းႁိမၼ်း ပူၺ်ႇယဝ်ႉ ၸင်ႇၵွႆႈ ဢဝ် မၢၵ်ႇၶိူဝ်သူမ်ႈ ဢၼ်သွႆးဝႆႉၼၼ်ႉ သႂ်ႇသေၵေႃႈ ၶူၼ်းသေ ၶိုၼ်းတင်ႈဝႆႉပၼ်။
6. ပေႃးတင်ႈဝႆႉတၢၼ်ႇတၢၼ်ႇ ၼမ်ႉဝၢၼ်မၢၵ်ႇၶိူဝ်သူမ်ႈမၼ်းဢွၵ်ႇမႃး လႄႈ ဢၢႆၽၵ်းႁိၵေႃႈ ႁွမ်မႃး ၸိမ်းတူၺ်းၵေႃႈ တူဝ်ၽၵ်းႁိမၼ်း ပူၺ်ႇလီလၢၼ်ႈလီယဝ်ႉၼႆၵေႃႈ ၵွၼ်ႉသႂ်ႇၼႂ်းဝၢၼ်ႇသေ တမ်းၵိၼ်လႆႈယဝ်ႉ။

ဢၼ်ၵပ်းမၼ်း

ၽၵ်းႁိၵႅင်ၼႆႉ ပေႃးဝႃႈ ဢမ်ႇတၼ်းႁဵတ်း ၼမ်ႉၽိတ်ႉၶိုၵ်ႉၶၢႆးသင်ၵေႃႈ ႁဵတ်းထူဝ်ႇၼဝ်ႈၽွင်ၵပ်းၵေႃႈ ဝၢၼ်ယူႇၵူၺ်း။ ဢဝ်ၽွင်ထူဝ်ႇၼဝ်ႈ လေႃးၵၼ်တင်း ၵိူဝ်၊ ၽွင်ဝၢၼ်၊ မၢၵ်ႇၽိတ်ႉၽွင်သေ ၶူၼ်းၶဝ်ႈလေႃးၵၼ်သေၵေႃႈ ၵိၼ်ၵပ်းၵၼ်တင်း ၽၵ်းႁိၵႅင်ၼႆတႄႉ ပဵၼ်ဢၼ် လၼ်ႇၵမ်းၶဝ်ႈလီဝႆႉယဝ်ႉ။ ပေႃးလႆႈၸႂ်ၵိၼ် ၽၵ်းမီႇႁူဝ်လႅင်ၵေႃႈ ပွၵ်ႇႁဵတ်းၵိပ်ႇသေ ၵိၼ်ၵပ်းၵၼ်ၵေႃႈ ဝၢၼ်ႇယူႇမဵဝ်းၼိုင်ႈယဝ်ႉ။

မၢႆတွင်း

မိူဝ်ႈသႂ်ႇတူဝ်ၽၵ်းႁိ လႄႈ ၽၵ်းမီႇၼၼ်ႉ ယႃႇပေၽူမ်ႈဢဝ် မၢၵ်ႇၶိူဝ်သူမ်ႈသႂ်ႇလေႃးၵမ်းလဵဝ်။ ပေႃးဢဝ် မၢၵ်ႇၶိူဝ်သူမ်ႈသႂ်ႇလေႃးၵမ်းလဵဝ်ၼႆ ၽၵ်းႁိမၼ်းၼၢၼ်းပူၺ်ႇၼႆယဝ်ႉ။ မိူဝ်ႈလႂ် ၽၵ်းႁိႁဝ်း ပူၺ်ႇလၢၼ်ႈမႃးယဝ်ႉ ၸင်ႇၵွႆႈဢဝ် မၢၵ်ႇၶိူဝ်သူမ်ႈသႂ်ႇတႃႉ။